غرب اردن میں صیہونی آباد کاری کے خلاف ریلیوں پر اسرائیلی تشدد
شیعہ نیوز (پاکستانی شیعہ خبر رساں ادارہ) فلسطین کے مقبوضہ مغربی کنارے میں صیہونی آباد کاری کے خلاف فلسطینیوں کی طرف سے نکالی گئی پر امن ریلیوں پر اسرائیلی فوج نے طاقت کا وحشیانہ استعمال کیا ہے جس کے نتیجے میں درجنوں فلسطینی زخمی جب کہ آنسوگیس کی شیلنگ سے کئی بے ہوش ہوگئے۔
مقامی فلسطینی ذرائع نے بتایا کہ مقبوضہ مغربی کنارے کے جنوبی شہر الخلیل میں صوریف کے مقام پر فلسطینیوں کی بڑی تعداد نے صیہونی آباد کاری کے خلاف جلوس نکالا۔
اسرائیلی فوج نے فلسطینی مظاہرین اور ان کی کوریج کرنے والے صحافیوں کو بھی براہ راست گولیوں کا نشانہ بنایا اور ان پرآنسوگیس کی شیلنگ کی جس کے نتیجے میں درجنوں فلسطینی زخمی اور بے ہوش ہوگئے۔
اس موقع پر اسرائیلی فوج کےحملے میں صحافی معاذ عمارنہ اور متعدد دیگر صحافی اور فوٹوگرافر زخمی ہوگئے۔
عینی شاہدین نے بتایا کہ اسرائیلی فوج نے مظاہرین پراندھا دھند آنسوگیس کی شیلنگ کی اور ان پر گولیاں چلانے کے ساتھ لاٹھی چارج کیا جس کھے نتیجے میں درجنوں مظاہرین زخمی ہوگئے۔
ادھر فلسطینیوں کی بڑی تعداد نے صوریف کے مقام پر عصیون صیہونی کالونی کے بالمقابل القرینات قصبے میں فلسطینی اراضی پر نماز جمعہ ادا کی۔ اسرائیلی فوج نے اس جگہ پرقبضے کے نوٹس جاری کر رکھے ہیں۔
ادھر مغربی نابلس میں کفر قدوم کے مقام پر اسرائیلی فوجیوں نے صیہونی آباد کاری کے خلاف فلسطینی جلوس پر آنسوگیس اور صوتی بم استعمال کیے۔
