حدیث غدیر اہل بیت علیہم السلام کی صداقت پر بہترین گواہ ہے، علامہ مقصود ڈومکی
شیعہ نیوز: مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا ہے کہ اہل سنت کے جید علمائے کرام نے حدیث غدیر کی تائید و تصدیق کرکے دشمنان اہل بیت کو شکست دے دی ہے۔ حدیث غدیر اہل بیت علیھم السلام کی صداقت پر بہترین گواہ ہے۔ ان خیالات کا اظہار انہوں نے مدرسہ خاتم النبیین صلی اللہ علیہ وآلہ وسلم کوئٹہ میں عید غدیر کی مناسبت سے منعقدہ تقریب تقسیم انعامات کے موقع پر شرکاء سے خطاب کرتے ہوئے کیا۔ تقریب سے علامہ مقصود علی ڈومکی نے خطاب کرتے ہوئے کہا کہ عید غدیر امت مسلمہ کے درمیان اتحاد و وحدت کا باعث ہے۔ عید غدیر کے خلاف پروپیگنڈا کرنے والے ناصبی امت مسلمہ کے درمیان اختلاف پیدا کرنے میں مکمل طور پر ناکام ہو گئے، کیونکہ اہل سنت کے جید علمائے کرام نے حدیث غدیر کی تائید و تصدیق کرکے دشمنان اہل بیت کو شکست دے دی ہے۔ فرمان رسول صلی اللہ علیہ وآلہ وسلم کی روشنی میں آج شیعہ سنی مسلمان مل کر عید غدیر منا رہے ہیں۔
انہوں نے کہا کہ قرآن کریم اور عترت اہل بیت علیہم السلام اللہ تعالیٰ کی رسی ہے۔ جسے مضبوطی سے تھامنے کا حکم دیا گیا ہے۔ حدیث غدیر اہل بیت علیھم السلام کی صداقت پر بہترین گواہ ہے۔ آج نظام ولایت و امامت پوری دنیا میں اسلام ناب محمدی کا علمبردار ہے۔ حکومت اسلامی اور نظام ولایت فقیہ پیغام غدیر کا تسلسل ہے۔ اس موقع پر تقریب میں مولانا علی عمران نقوی، مولانا نور حسین اندرزگو اور مجلس وحدت مسلمین بلوچستان کے صوبائی رابطہ سیکرٹری سید گلزار علی شاہ بخاری نے مدرسہ خاتم النبیین صلی اللہ علیہ وآلہ وسلم کے طلباء میں انعامات تقسیم کئے۔
