ہم حماس کے آخری جنگجو تک کبھی نہ پہنچ پائینگے، اسرائیلی میڈیا

شیعہ نیوز: غاصب اسرائیلی رژیم کے عبری میڈیا نے اعلان کیا ہے کہ فلسطینی مزاحمتی تحریک حماس کی سرنگیں اگلے 10 سے 12 سال تک بھی غزہ کی پوری پٹی میں موجود رہیں گی اور ہم حماس کے آخری جنگجو تک کبھی نہ پہنچ پائیں گے! اس حوالے سے جاری ہونے والی اپنی خصوصی رپورٹ میں اسرائیلی چینل 12 نے صیہونی فوج کے ایک ریٹائرڈ جنرل سے نقل کرتے ہوئے اعلان کیا کہ غزہ میں جاری گوریلا جنگ انتہائی خوفناک ہے جس کے باعث اسرائیلی فوج کی کامیابیوں میں نمایاں کمی ہوئی ہے۔ رپورٹ کے مطابق اسرائیلی فوج میں سابق کمانڈر آپریشنز "اسرائیل زیو” نے زور دیتے ہوئے کہا کہ صیہونی فوج، جاری صورتحال پر مکمل طور پر قابو پا ہی نہیں سکتی جبکہ حماس اسی چیز کا فائدہ اٹھاتے ہوئے مسلسل حیران کن اور برق آسا حملے کر رہی ہے۔ اسرائیلی جنرل نے مزید کہا کہ اگر یہ جنگ مزید جاری رکھی گئی تو، یہ کسی بھی قسم کی فتح کے کھوکھلے نعروں اور کسی بھی حتمی نتیجے کے بغیر برسوں تک جاری رہ سکتی ہے!