شہباز شریف کو مشورہ دیتا ہوں کہ اسمبلی توڑ کر الیکشن کروا دیں

شیعہ نیوز:سابق وزیر داخلہ شیخ رشید احمد نے کہا ہے کہ اگر کوئی عقل مند ہے تو 72 گھنٹوں میں قومی اسمبلی توڑ کر پنجاب اور کے پی کیساتھ ہی الیکشن کروا دے، کل دو اہم شخصیات ملی ہیں، آج کچھ ایجنسیوں کے لوگ ملے ہیں۔ ایک نجی ٹی وی چینل کے پروگرام میں بات کرتے ہوئے شیخ رشید نے کہا کہ شہباز شریف کو مشورہ دیتے ہیں کہ اسمبلی توڑ کر الیکشن کروا دیں۔ شیخ رشید نے کہا کہ 10 سے 15 دن میں حالات بہتر ہوتے دیکھ رہا ہوں، نواز شریف آجائیں، ان کا بھائی وزیراعظم ہے، ایک ساتھ الیکشن ہو جائیں تو ان کی بچت ہے، ورنہ صفایا ہو جائے گا، اکٹھے الیکشن کروانے کیلئے ذمہ داران کو کردار ادا کرنا چاہیئے۔

سابق وزیر داخلہ نے کہا کہ یہ کہتے ہیں کہ سیاست داؤ پر لگائی ہے، انہوں نے ریاست داؤ پر لگا دی ہے، اپنے کیس ختم کروانے کے علاوہ انہوں نے کیا کیا ہے۔ شیخ رشید نے کہا کہ عمران خان کو آرمی چیف سے ضرور ملنا چاہیئے، جو غلط فہمیاں پیدا ہوئی ہیں یا پیدا کی گئی ہیں، دور کرنی چاہئیں، میں وزیر داخلہ تھا تو میری ان سے ملاقات ہوئی، کچھ بدل گئے ہیں، کچھ نہیں بدلے۔ سابق وزیر داخلہ نے کہا کہ پاکستان اندر سے ڈوب رہا ہے، سرحدوں پر خطرہ نہیں، ان سے آئی ایم ایف سنبھالا نہیں جا رہا، میری آنکھوں پر پٹیاں باندھی گئیں، میں نے باہر آکر شور نہیں مچایا، نون لیگ کی تباہی ہوئی ہے، پیپلز پارٹی سندھ میں سیاست کر رہی ہے۔