عمران خان کو اپنی بیرک کی صفائی کی مشقت پر لگا دیا گیا

شیعہ نیوز: اڈیالہ جیل میں قید بامشقت کے قیدی نمبر 804، بانی پی ٹی آئی عمران خان کو بھی میاں نواز شریف والی سزا مل گئی۔ آئی جی جیل خانہ جات میاں فاروق نذیر کے مطابق مشقت کے طور پر بانی پی ٹی آئی عمران خان بھی اپنے کمرے کی صفائی ستھرائی اور تزئین و آرائش کا خیال رکھیں گے، عدالتی احکامات موصول ہونے کے بعد جیل سپرنٹنڈنٹ نے سزا پر عملدرآمد کا حکم دیدیا ہے۔ آئی جی جیل خانہ کے مطابق سکیورٹی وجوہات کی بناء پر عمران خان کو اپنے کمرے کی تزئین و آرائش اور صفائی ستھرائی خود اپنے ہاتھوں سے کرنے کی سزا دی گئی ہے۔ آئی جی جیل کے مطابق عمران خان کو کوئی دوسری سزا دینے سے سکیورٹی ایشوز بن سکتے ہیں، مشقت کے دوران کوئی دوسرا قیدی ان پر حملہ بھی کر سکتا ہے، اس لئے ان سے ان کی بیرک سے باہر کی مشقت نہیں لی گئی۔ یاد رہے کہ میاں نواز شریف کو بھی کوٹ لکھپت جیل میں مشقت کے طور پر اپنی ہی بیرک کی صفائی کا کام دیا گیا تھا۔