پنشن اصلاحات کے نام پر غریب ملازمین کے لیے زندگی مشکل کر دی ہے، اپوزیشن لیڈر کاظم میثم
موجودہ نظام عوام میں مایوسی پھیلانے اور خطے کو بحران کی طرف دھکیلنے کا سب سے بڑا ذریعہ ہے، جس طرح سیاسی رہنماوں اور حقوق کے لیے آواز بلند کرنے والوں کو روندا جا رہا ہے اس کے سنگین نتائج آئیں گے
شیعہ نیوز: گلگت بلستستان اسمبلی میں قائد حزب اختلاف اور رہنماء مجلس وحدت مسلمین کاظم میثم نے اپنے ایک بیان میں کہا ہے کہ پنشن اصلاحات کے نام پر غریب ملازمین کے لیے زندگی مشکل کر دی ہے، انہوں نے مزید کہا کہ ملک میں ہر طرف عوام دشمن فیصلے حاکم ہیں اور عام عوام کاکوئی پرسان حال نہیں ہے، گلگت بلتستان کے ایسے بھی نمائندہ ہیں جو وفاق پر ترس کھاکر جی بی میں فنڈز دلانے سے روکتے ہیں۔
اپوزیشن لیڈر کاظم میثم کا کہنا تھا کہ تھرمل پاور کے لیے فنڈ جاری ہونے کے باوجود گلگت، ہنزہ، سکردو اور چلاس میں تاریکی کم نہیں ہوسکی، گلگت بلتستان کی معدنیات پر بندربانٹ نہیں ہونے دیں گے، عوامی پہاڑوں کو لیز کے نام پر ہڑپ نہیں ہونے دیں گے۔
یہ بھی پڑھیں: ایم ڈبلیو ایم کے زیر اہتمام ممبران قومی اسمبلی کے ہمراہ ملکی سیاسی و امن و امان کی صورتحال پر ایک اہم نشست
کاظم میثم کے مطابق مقپون داس کی اراضی یہاں کے عوام کی ہے بلامعاوضہ قبضہ ہونے نہیں دیں گے، مقپون داس کے فریقین کے تحفظات دور کیے بنا کسی کو دینے نہیں دیں گے۔
انہوں نے مزید کہا کہ موجودہ نظام عوام میں مایوسی پھیلانے اور خطے کو بحران کی طرف دھکیلنے کا سب سے بڑا ذریعہ ہے، جس طرح سیاسی رہنماوں اور حقوق کے لیے آواز بلند کرنے والوں کو روندا جا رہا ہے اس کے سنگین نتائج آئیں گے۔
