رمضان المبارک جیسے بابرکت مہینے میں مہنگائی نے عوام کا جینا دوبھر کر دیا ہے
شیعہ نیوز (پاکستانی شیعہ خبر رساں ادارہ) رمضان المبارک جیسے برکتوں بھرے مہینے میں شدید مہنگائی نے عوام کا جینا دوبھر کر دیا ہے۔ ناجائز منافع خوری کی وجہ سے اشیاء خوردونوش کی قیمتیں آسمان سے باتیں کر رہی ہیں۔ ان خیالات کا ظہار وائس چیئرمین مجلس وحدت مسلمین پاکستان علامہ سید احمد اقبال رضوی نے اپنے بیان میں کیا۔
انہوں نے کہا کہ جو سستی اشیاء پر مشتمل بازار بنائے گئے ہیں ان میں بھی چیزیں عوام کی قوت خرید سے باہر ہیں، اس کمر توڑ مہنگائی میں متاثرہ عوام کا کوئی پرسان حال نہیں ہے، صاحب ثروت افراد سے اپیل کرتے ہیں کہ وہ ماہ مبارک میں غریب عوام کی مشکلات کے پیش نظر ان کی مدد کریں۔
یہ خبر بھی پڑھیں روزہ محض بھوکا رہنے کا نام نہیں بلکہ اپنے تمام اعضا کو غیر شرعی امور سے دور رکھنے کا نام ہے،علامہ صادق جعفری
علامہ احمد اقبال رضوی نے کہا کہ جس حکومتی مشینری کا سیاسی مقاصد کے لیے بےجا استعمال ہو رہا ہے، اسے گراں فروشوں کے خلاف استعمال کرتے ہوئے حکومتی عملداری کو یقینی بنایا جاتا تو کتنا ہی اچھا ہوتا، ارباب اختیار کو چاہیے کہ مؤثر حکمت عملی اختیار کرتے ہوئے پرائس کنٹرول کمیٹیاں تشکیل دے کر عوام کو ریلیف فراہم کریں، مصنوعی مہنگائی کے ذمہ داران کو بھاری جرمانے کیئے جائیں، اگر یہی صورتحال رہی تو عوام فاقوں پر مجبور ہو جائیں گے۔
انہوں نے کہا کہ عوام کو مفت آٹے کی فراہمی میں خوار کیا جا رہا ہے آئے روز بزرگ خواتین و مرد اپنی جانیں گنوا رہے ہیں، جسے منظم اور مربوط انداز سے بھی چلایا جا سکتا تھا، اگر حکومت اس مہم میں مزید دلچسپی اور توجہ کا مظاہرہ کرتی تو عوام تک آٹے کی فراہمی کو عزتمندانہ طریقے سے ممکن بنایا جا سکتا تھا۔
