ایران اور حماس کے تعلقات گہرے، تاریخی اور مضبوط ہیں۔خلیل الحیہ

شیعہ نیوز (پاکستانی شیعہ خبر رساں ادارہ) فلسطین کی اسلامی مزاحمتی تحریک حماس کے ایک رہنما خلیل الحیہ نے کہا ہے کہ ایران کے ساتھ ہمارے تعلقات تاریخی اور مضبوط ہیں۔

العالم کی رپورٹ کے مطابق فلسطین کی اسلامی تنظیم حماس کے رہنما خلیل الحیہ نے مختلف ممالک کے دورے کے بعد غزہ میں پریس کانفرنس سے خطاب کرتے ہوئے کہا کہ ایران اور حماس کے تعلقات مضبوط اور مستحکم ہیں اور دنیا کی کوئی طاقت ان میں خلل ایجاد نہیں کرسکتی ۔

خلیل الحیہ نے کہا کہ شہید قاسم سلیمانی نے فلسطینیوں کی مدد میں کوئی کمی باقی نہیں چھوڑی ،اور ہم آج اتنے مضبوط ہوگئے ہیں کہ ہم اسرائیلیوں کا پتھروں کے بجائے راکٹوں سے مقابلہ کررہے ہیں ہمیں مضبوط بنانے میں شہید جنرل قاسم سلیمانی کا بنیادی اور اساسی کردار ہے۔

شہید سلیمانی کے اسی بنیادی کردار کے پیش نظر حماس کے سابق وزير اعظم اور سیاسی شعبہ کے سربراہ اسماعیل ہنیہ ایک اعلی وفد کے ہمراہ شہید قاسم سلیمانی کی تشییع جنازہ میں شریک ہوئے۔

خلیل الحیہ نے کہا کہ شام کے بحران کے ابتدائی کچھ سالوں میں ایران اور حماس کے تعلقات کمزور ہوگئے تھے لیکن شہید قاسم سلیمانی نے تعلقات کو پھر پہلی سطح پر پہنچا دیا کیونکہ شام کے مسئلہ میں ایران حق بجانب تھا اور ہم داعش کے دلدل میں گرفتار ہونے سے بچ گئے۔