خطے میں امن اور صلح کی ترویج کے لئے اقوام متحدہ سے تعاون کے لئے تیار ہیں، ایران

شیعہ نیوز: اقوام متحدہ میں ایران کے مستقل مندوب اور سفیر امیر سعید ایروانی نے کہا ہے کہ ایران مسائل کے حل اور علاقے میں امن و سلامتی کے فروغ میں شنگھائي تعاون تنظیم اور اقوام متحدہ کے پلیٹ فارم سے تعاون کے لئے پوری طرح تیار ہے۔

رپورٹ کے مطابق اقوام متحدہ میں ایران کے مستقل مندوب اور سفیر نے یہ بات ” دہشت گردی کے خطرات کے مقابلے میں علاقائی تنظیموں کے ساتھ اقوام متحدہ کے تعاون اور شنگھائی تعاون تنظیم، دولت مشترکہ نیز اجتماعی سلامتی کی تنظیم کے کردار” کے زیر عنوان منعقدہ سلامتی کونسل کے اجلاس سے خطاب میں کہی ہے ۔

انھوں نے کہا کہ موجودہ پیچیدہ عالمی حالات میں، بین الاقوامی امن وسلامتی کے لئے قومی، علاقائی اور بین الاقوامی، سبھی سطح پر کام کرنے کی ضرورت ہے ۔

یہ بھی پڑھیں : تل ابیب پر یمن کا ڈرون حملہ، وحدت اسلامی کا ثبوت ہے، حماس

امیر سعید ایروانی نے کہا کہ موجودہ حالات میں، اس حوالے سے علاقائی تنظیموں کے ساتھ اقوام متحدہ کے تعاون کی ضرورت، پہلے سے زیادہ محسوس کی جارہی ہے۔

ان کا کہنا تھا کہ علاقائی تنظیمیں مقامی مسائل کو زیادہ اچھی طرح سمجھتی ہیں اور ان کے حل کے لئے حقیقت پسندانہ نظریات کے ساتھ ضرورتوں کا اداراک کرتے ہوئے، بہتر راہیں پیش کرسکتی ہیں۔

انھوں نے مزید کہا کہ اس وقت افغانستان کو جن چیلنجوں اور مسائل کا سامنا ہے، ان کے پیش نظر، ہم سمجھتے ہیں کہ افغانستان میں ترقی اور استحکام کی تقویت کے لئے، اقوام متحدہ اور شنگھائی تعاون تنظیم کے درمیان تعاون کی کافی گنجائش پائی جاتی ہے۔

امیر سعید ایروانی نے کہا کہ شنگھائی تعاون تنظیم اوراقوام متحدہ سیکورٹی، اقتصادی ترقی، انسان دوستانہ امداد، سیاسی حمایت اور علاقائی اتحاد و یک جہتی میں تعاون کے ذریعے، افغانستان میں خوشحالی اور ثبات واستحکام میں مدد کرسکتے ہیں۔

اقوام متحدہ میں ایران کے مستقبل مندوب نے کہا کہ بنیادی ڈھانچے کے مشترکہ منصوبوں کے ذریعے بھی افغانستان کی اقتصادی ترقی ميں مدد کی جاسکتی ہے۔