آئی ایس او کا شیعہ مسنگ پرسنز کیلئے بھوک ہڑتالی کیمپ کی حمایت کا اعلان

شیعہ نیوز:امامیہ سٹوڈنٹس آرگنائزیشن پاکستان کے مرکزی سیکرٹری جنرل سید معمر نقوی نے کہا ہے کہ پاکستان میں شیعہ مسنگ پرسنز کا معاملہ سنگین ہے، جسے اب حل ہونا چاہیئے۔ لاہور میں اجلاس سے خطاب کرتے ہوئے انہوں نے کہا کہ لاپتہ شیعہ عزاداروں کے ورثاء کے مطالبات اور کراچی میں بھوک ہڑتالی کیمپ کی مکمل حمایت کرتے ہیں۔ سید معمر نقوی نے کہا کہ ہم لاپتہ افراد کی بازیابی تک چین سے نہیں بیٹھیں گے، اگر مطالبات پورے نہ کیے گئے تو پاکستان بھر میں دس محرم الحرام کو احتجاج کیا جائے گا۔ انہوں نے کہا کہ ماورائے عدالت اقدامات کسی صورت قبول نہیں، اس سے معاشرے میں اداروں کیخلاف منفی جذبات پیدا ہوتے ہیں۔

معمر نقوی نے کہا کہ دس محرم سے قبل تمام لاپتہ افراد کو رہا کیا جائے، اگر دس محرم تک لاپتہ افراد کو رہا نہ کیا گیا تو ملک بھر میں یوم عاشور کے جلوس روک دیئے جائیں گے اور اس وقت تک کوئی جلوس اختتام پذیر نہیں ہو گا جب تک لاپتہ تمام افراد رہا نہیں ہو جاتے۔ انہوں نے کہا کہ ان لوگوں نے کوئی جرم کیا ہے تو انہیں عدالتوں میں پیش کرکے سزائیں دلوائی جائیں، بے گناہ کسی کو غائب کرکے برسوں غیر قانون قید میں رکھنا قابل قبول نہیں۔ انہوں نے کہا کہ اس معاملے پر پوری شیعہ قوم متحد ہے اور پورے پاکستان کا ایک ہی مطالبہ ہے کہ عزاداروں کو رہا کیا جائے۔