کراچی یونیورسٹی میں آئی ایس او کے زیراہتمام یوم مصطفیٰؐ کا انعقاد
شیعہ نیوز (پاکستانی شیعہ خبر رساں ادارہ) امامیہ اسٹوڈنٹس آرگنائزیشن کراچی یونیورسٹی کی جانب سے سالانہ یوم مصطفیٰ کا انعقادکراچی یونیورسٹی کے ایڈمن پارکنگ گراؤنڈ میں کیا گیا جس میں طلبا و طالبات کی بڑی تعداد نے شرکت کی۔
کراچی یونیورسٹی میں منعقدہ یوم مصطفیٰؐ کی تقریب سے خطاب کرتے ہوئے آئی ایس او پاکستان کے مرکزی صدر عارف حسین الجانی نے کہا کہ سیرت نبویؐ کو اپنی زندگی میں نمونہ عمل بنائیں، یہی نجات کا راستہ ہے، اسلام سلامتی اور محبت کا دین ہے، شدت پسندی اسلامی تعلیمات کے خلاف ہے۔
شیخ الجامعہ پروفیسر ڈاکٹر خالد محمود عراقی نے نے اپنے خطاب میں کہا کہ عالم اسلام کو مزید بیدار ہونے کی ضرورت ہے، تکفیری عناصر اسلام کا جھوٹا چہرہ بنا کر بیش کرتے ہیں۔ڈاکٹر معراج الہدای صدیقی نے کہا کہ ہمیں حضور اکرمؐ کی سنت پر عمل کرکے اسلام اور دین محمدؐ کا بول بالا کرنا ہوگا اور سرکارؐ کی رسالت سے وفاداری کا تقاضا بھی یہی ہے۔
مولانا کاظم عباس نقوی نے کہا کہ امت مسلمہ کو حضرت محمد مصطفیٰؐ کی سیرت و تعلیمات پر عمل کرتے ہوئے عالمی امن و استحکام کے لئے اپنا کردار ادا کرنا ہوگا۔
معروف نوجوان شاعر اہلبیتؑ میر سجاد میر، معروف نعت خواں ناصر عزیز و دیگر نے بارگاہ رسالتؐ میں نذرانہ عقیدت پیش کیا۔
اس موقع پر پروفیسر ڈاکٹر زاہد علی ، ڈاکٹر انور زیدی، پروفیسر ڈاکٹر جمیل کاظمی، ڈاکٹر تنویر عباس، ڈاکٹر جاوید ہاشمی، پروفیسر ثمر سلطانہ، آئی ایس او کراچی ڈویژن کے صدر محمد عباس سمیت دیگر اساتذہ اور طلبا و طالبات کی کثیر تعداد موجود تھی۔
