اسرائیل کا امدادی کشتی "حنظلہ” پر حملہ اور کارکنان کی گرفتاری

شیعہ نیوز: غزہ کا محاصرہ توڑنے کے لیے اٹلی سے روانہ ہونے والی امدادی کشتی پر صہیونی افواج نے 40 میل دور سمندر میں حملہ کیا، لائیو نشریات منقطع، امدادی کارکنوں کو گرفتار کرکے اشدود لے جانے کا انکشاف۔

فلسطین پر جاری محاصرہ توڑنے کی عالمی کوششوں کو ایک بڑا دھچکا، اسرائیلی فوج نے امدادی مشن کا حصہ بننے والی امدادی کشتی "حنظلہ” کو بین الاقوامی پانیوں میں گھیر کر اس پر حملہ کیا اور متعدد امدادی کارکنوں کو گرفتار کر لیا۔

فریڈم فلوٹیلا مشن کے مطابق، یہ حملہ غزہ کے ساحل سے 40 میل دور بین الاقوامی پانیوں میں کیا گیا۔

یہ بھی پڑھیں : پاکستانی قدرتی وسائل اور ریکوڈک کان صدر ٹرمپ کے نشانے پر

اسرائیلی اہلکاروں نے امدادی کشتی میں زبردستی داخل ہو کر افراد کو تشدد کا نشانہ بنایا، تمام لائیو نشریات بند کر دیں اور کشتی پر مکمل کنٹرول حاصل کر لیا۔

اسرائیلی ذرائع ابلاغ کے مطابق، کشتی کو اشدود بندرگاہ منتقل کیا جا رہا ہے اور سوار تمام کارکنوں کو مقبوضہ علاقوں سے نکال دیا جائے گا۔

عالمی ردعمل اور آئندہ لائحہ عمل:

اس واقعے کے باوجود، امدادی کمیٹی نے واضح کیا ہے کہ غزہ کی ناکہ بندی اور جاری مظالم کے خلاف جہد مسلسل جاری رہے گی۔ فریڈم فلوٹیلا مشن کی جانب سے مستقبل میں مزید کشتیاں روانہ کیے جانے کا اعلان کیا گیا ہے۔

انسانی حقوق کے ماہرین اور عالمی تنظیمیں اس اقدام کو بین الاقوامی قوانین کی سنگین خلاف ورزی قرار دے رہی ہیں، اور دنیا بھر میں فلسطین سے یکجہتی کے مظاہروں اور احتجاجات کی توقع کی جا رہی ہے۔