اسرائیل عالمی عدالت انصاف کے فیصلے پر عمل درآمد نہیں کررہی، ہیومن رائٹس واچ

شیعہ نیوز: یورپی ہیومن رائٹس واچ نے رپورٹ دی ہے کہ اسرائیل عالمی عدالت انصاف کے فیصلے کی پرواہ کیے بغیر غزہ میں فلسطینیوں کی نسل کشی اور قتل عام جاری رکھے ہوئے ہے۔

فلسطینی شہاب نیوز ایجنسی نے خبر دی ہے کہ یورپی میڈیٹیرینین ہیومن رائٹس واچ کی جانب سے جاری ایک بیان میں کہا گیا ہے کہ عالمی عدالت انصاف کے فیصلے کو 15 دن گزرنے کے باوجود صیہونی حکومت غزہ کی پٹی میں فلسطینیوں کا بڑے پیمانے پر قتل عام کر رہی ہے اور صہیونی فوج کے وحشیانہ جرائم جاری ہیں جس سے یہ ثابت ہوتا ہے کہ غزہ کے عام شہریوں کا قتل عام بڑے پیمانے پر جاری ہے اور وہ چھوٹے سے چھوٹے انسانی حقوق سے بھی محروم ہیں اور اس حکومت نے محاصرے میں ڈال کر انہیں خوراک، پانی اور ادویات تک سے محروم کر دیا ہے۔

یہ بھی پڑھیں : بیلجیم، غزہ کے عوام کی حمایت میں بڑے پیمانے پر مظاہرے

بیان میں اس بات پر زور دیا گیا ہے کہ اسرائیلی فوج غزہ میں رہائشی علاقوں، مکانات، شہری بنیادی ڈھانچے اور شہری سہولیات کو وسیع پیمانے پر تباہ کرنے کی پالیسی پر عمل درآمد جاری رکھے ہوئے ہے اور اس کی وجہ سے غزہ کے بیشتر علاقے ناقابل رہائش بن چکے ہیں۔

واضح رہے کہ دو ہفتے قبل عالمی عدالت انصاف کے ججوں نے جنوبی افریقہ کی درخواست پر صیہونی حکومت کے خلاف عارضی احکام جاری کرتے ہوئے اس رجیم سے کہا کہ وہ غزہ میں نسل کشی کو روکنے کے لیے تمام ضروری اقدامات کرے۔

عالمی عدالت انصاف نے صیہونی حکومت کو حکم دیا کہ وہ ایک ماہ کے اندر اندر عدالت کو نسل کشی کی روک تھام کے لیے کیے گئے تمام اقدامات کی رپورٹ پیش کرے۔