اسرائیل غزہ میں بھوک کو بطور ہتھیار استعمال کر رہا ہے، امیر سعید ایروانی

اقوام متحدہ میں ایران کے مستقل نمائندے نے کہا کہ عام فلسطینی شہریوں کہ جن میں بے شمار معصوم بچے اور پورے کے پورے فلسطینی خاندان بھی شامل ہیں، کو منظم طریقے سے بنیادی انسانی ضروریات سے محروم کر دیا گیا ہے جنہیں اس وقت بھوک، طبی امداد کے فقدان اور بے گھر ہو جانے کے مسلسل خطرے کا سامنا ہے۔ امیر سعید ایروانی نے کہا کہ غاصب اسرائیلی رژیم کی نسل پرست کابینہ اب بھی بھوک کو عام فلسطینی شہریوں کے خلاف بطور ہتھیار استعمال کر رہی ہے۔ اس بات پر زور دیتے ہوئے کہ غزہ کے لئے تمام انسانی امداد 2 ہفتوں سے زائد کے عرصے سے مکمل طور پر معطل ہے، سلامتی کونسل میں اپنے خطاب کے دوران ایرانی سفیر نے تاکید کی کہ ناکہ بندی نے ضروری ویکسینیشن سمیت دیگر تمام اہم خدمات کی فراہمی کو بھی غیر معینہ مدت کے لئے معطل کر دیا ہے۔ انہوں نے کہا کہ یہ انسانیت سوز اقدامات، نہ صرف غزہ میں امداد کے داخلے پر پابندی سے بڑھ کر تخریبکارانہ ہیں بلکہ یہ فلسطینی شہریوں کے وقار اور ان کے بنیادی حق زندگی کو بھی پائمال کر دینے کی مذموم کوشش ہیں۔ اس حوالے سے اپنی گفتگو کے آخر میں امیر سعید ایروانی نے کہا کہ غزہ کو متحد رہنا چاہیئے اور اس کے باشندوں کو بے گھر ہو جانے یا اس منظم جبر کا نشانہ بننے پر مجبور نہیں کیا جانا چاہیئے!