وہ وقت دور نہیں جب اسرائیل صفحہ ہستی سے نابود ہو جائے گا
شیعہ نیوز (پاکستانی شیعہ خبر رساں ادارہ) وہ وقت دور نہیں جب اسرائیل صفحہ ہستی سے نابود ہو جائے گا اور فلسطین کے مظلوم عوام آزاد فضاوں میں سانس لے سکیں گے۔ ان خیالات کا اظہار وائس چیئرمین ایم ڈبلیو ایم پاکستان علامہ احمد اقبال رضوی نے لاہور میں آل پارٹیز کانفرنس سے خطاب کرتے ہوئے کیا۔
امامیہ اسٹوڈنٹس آرگنائزیشن پاکستان لاہور ڈویژن کے زیرِ اہتمام آل پارٹیز کانفرنس بعنوان "حمایتِ مظلومینِ جہاں و آزادی القدس” ادارہ موسسہ علومِ اسلامی جماران میں منعقد کی گئی۔ کانفرنس میں مجلس وحدت مسلمین، آئی ایس او پاکستان، فلسطین فاؤنڈیشن چیپٹر لاہور، مجلس علمائے شیعہ،امامیہ آرگنائزیشن لاہور اور مصطفوی اسٹوڈنٹس موومنٹ سمیت دیگر ملی اداروں اور طلباء تنظیموں کے سربراہان و نمائندگان نے شرکت کی اور یوم القدس جیسی عالمی جہد کی اہمیت پر گفتگو کی۔
یہ خبر بھی پڑھیں قائداعظم کے پاکستان میں اسرائیل کے لئے کوئی جگہ نہیں
وائس چیئرمین ایم ڈبلیو ایم پاکستان علامہ احمد اقبال رضوی کا کہنا تھا کہ وہ وقت دور نہیں جب اسرائیل صفحہ ہستی سے نابود ہو جائے گا اور فلسطین کے مظلوم عوام آزاد فضاوں میں سانس لے سکیں گے۔ انہوں نے کہا کہ پوری دنیا میں اب فلسطین کے مظلوم عوام کے حق میں آواز اٹھ رہی ہیں۔
انہوں نے کہا کہ امسال بھی عالمی یوم القدس روایتی جوش و جذبے سے منایا جائے گا۔ اس موقع پر تمام جماعتوں کے قائدین کی جانب سے بھی عالمی یوم القدس کو بھرپور تعاون اور جوش و جذبہ سے اجتماعی سطح پر منانے کا عزم کیا گیا۔ لاہور میں بھی مشترکہ القدس ریلی کے انعقاد پر اتفاق کیا گیا۔
