غزہ جنگ بندی کی خلاف ورزی، حماس کے مرکز پر اسرائیلی ڈرون حملہ

شیعہ نیوز: صیہونی دہشت گردوں نے جنگ بندی کی خلاف ورزی کرتے ہوئے غزہ میں حماس کے ٹھکانے پر ڈرون حملہ کیا ہے۔

فلسطینی نیوز ایجنسی شہاب کی رپورٹ کے مطابق غزہ کے مشرقی علاقے خان یونس میں واقع حماس کے ایک مرکز کو بدھ کی علی الصبح نشانہ بنایا گیا ہے۔

صیہونیوں نے اس حملے کے بعد دعوی کیا ہے کہ یہ حملہ آتشگیر غبارے چھوڑے جانے کے جواب میں کیا گیا ہے۔

واضح رہے کہ منگل کی صبح غزہ کے اطراف میں واقع غیرقانونی صیہونی بستیوں میں کم از کم 26 مقامات پر آتشزدگی کے واقعات رپورٹ کئے گئے ہیں۔

صیہونی ذرائع کا دعویٰ ہے کہ غزہ کے اطراف میں واقع غیر قانونی صہیونی کالونیوں میں منگل کی شام آتشگیر غباروں کے علاوہ بیلون کے ذریعے ایک بم کا دھماکہ بھی کیا گیا ہے۔

واضح رہے کہ تین سال قبل وطن واپسی مارچ کے آغاز کے ساتھ نہتے فلسطینی نوجوانوں نے صیہونیوں کی شرپسندی کا مقابلہ کرنے کے لئے ٹائروں کے دھویں، آتشگیر پتنگوں اور غباروں کا استعمال شروع کردیا تھا جو بدستور جاری ہے۔