جیکب آباد: انجمن محبانِ اہل بیت کے زیرِ اہتمام اہل غزہ سے اظہارِ یکجہتی کے لیے احتجاجی ریلی
مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا کہ "فلسطین و غزہ پر ڈھائے جانے والے مظالم نے پوری انسانیت کو جھنجھوڑ کر رکھ دیا ہے۔ آج وقت کا تقاضہ ہے کہ دنیا بھر کے مظلوم متحد ہو کر ظالموں کے خلاف میدانِ عمل میں آئیں
شیعہ نیوز: انجمن محبانِ اہل بیت جیکب آباد کے زیرِ اہتمام فلسطین اور غزہ کے مظلوم مسلمانوں سے اظہارِ یکجہتی کے لیے ایک پرامن احتجاجی ریلی نکالی گئی، جس میں بچوں نوجوانوں نے بھرپور شرکت کی۔ ریلی کے شرکاء نے ہاتھوں میں بینرز اور پلے کارڈز اٹھا رکھے تھے جن پر اسرائیلی مظالم اور عالمی خاموشی کے خلاف نعرے درج تھے۔ ریلی کے دوران معصوم بچوں نے غزہ میں شہید ہونے والے بچوں کے علامتی جنازے اٹھا کر اسرائیلی جارحیت پر شدید احتجاج کیا اور اقوامِ عالم کی بے حسی پر سوالات اٹھائے۔
پریس کلب جیکب آباد کے سامنے مظاہرین سے خطاب کرتے ہوئے مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا کہ "فلسطین و غزہ پر ڈھائے جانے والے مظالم نے پوری انسانیت کو جھنجھوڑ کر رکھ دیا ہے۔ آج وقت کا تقاضہ ہے کہ دنیا بھر کے مظلوم متحد ہو کر ظالموں کے خلاف میدانِ عمل میں آئیں۔” انہوں نے مزید کہا کہ "غزہ کی استقامت نے اسرائیل جیسے ظالم قوت کو ہزیمت سے دوچار کیا ہے۔ آج اسرائیل ظلم و بربریت کی علامت بن چکا ہے۔ مگر افسوس کہ ابھی تک افغانستان کے طالبان نے اس ظلم کے خلاف احتجاج میں لب کشائی نہیں کی۔ جبکہ اردن کے شاہ مصر کے جنرل سیسی ترکی کے اردوغان اور سعودی حکمران سبھی امریکا و اسرائیل کے سہولت کار بنے ہوئے ہیں۔”
یہ بھی پڑھیں: علامہ عارف واحدی کی مختلف اہلسنت علماء سے ملاقات ملکی و خطے کی صورتحال پر گفتگو
اس موقع پر انجمن محبان اہل بیت کے صدر سید مظہر علی شاہ نقوی نے کہا کہ ہم غزہ میں جاری ظلم و بربریت کے خلاف مسلسل احتجاج کر رہے ہیں۔ اسرائیل کے خلاف رہبر معظم سید علی خامنہ ای کی قیادت میں اھل حق مصروف پیکار ہیں۔ ہم رہبر معظم کے ساتھ تجدید عہد کرتے ہیں۔
اس موقع پر جماعت اسلامی کے ضلعی امیر محمد ابوبکر سومرو، اور مجلس وحدت مسلمین یوتھ ونگ کے ڈویژنل صدر سید کامران علی شاہ بخاری نے بھی خطاب کرتے ہوئے فلسطینی عوام کے ساتھ بھرپور اظہارِ یکجہتی کیا۔
