کرم کا مسئلہ سنگین، ریاست کئی روز سے جاری لڑائی کو روکنے میں مکمل ناکام نظر آتی ہے، علامہ جہانزیب علی
شیعہ نیوز: مجلس وحدت مسلمین صوبہ خیبر پختونخوا کے صدر علامہ جہانزیب علی نے دیگر صوبائی قائدین کے ہمراہ پشاور پریس کلب میں پریس کانفرنس سے خطاب کرتے ہوئے کہا ہے کہ پاراچنار ضلع کرم کا مسئلہ سنگین صورتحال اختیار کر چکا ہے، ریاست کئی روز سے جاری اس خطرناک لڑائی کو روکنے میں مکمل ناکام نظر آتی ہے، بلکہ یوں کہا جائے کہ مقامی انتظامیہ نے متعصبانہ رویہ اپناتے ہوئے مجرمانہ خاموشی اختیار کر رکھی ہے تو غلط نہ ہوگا۔ جس کی وجہ سے روزانہ بے گناہ افراد قتل ہو رہے ہیں، انہوں نے کہا کہ پاراچنار پاکستان کا بارڈر ایریا اور حساس ترین علاقہ ہے جس پر سرحد پار سے کئی مرتبہ لشکر کشی اور میزائلوں کے حملے ہو چکے ہیں، اس وقت بھی چاروں اطراف سے پاراچنار محاصرے میں ہے، حکومت کو سنجیدگی کے ساتھ ذمہ داری کا مظاہرہ کرتے ہوئے حالات کو کنٹرول کرنے کے عملی اقدامات اٹھانے چاہئیں تاکہ مزید قیمتی جانوں کے نقصان سے بچا جا سکے۔
انہوں نے کہا کہ پاراچنار کے محب وطن پاکستانی عوام آخر کب تک اس وحشیانہ دہشت گرد کارروائیوں کا نشانہ بنتے رہیں گے، تری منگل سکول میں قتل کئے گئے اساتذہ کے قاتلوں کو اب تک گرفتار کیوں نہیں کیا گیا، علاقے میں شرپسندی اور تعصبات کو ہوا دینے والے شریر عناصر کو کیفرِ کردار تک پہنچانے میں پس و پیش سے کام کیوں لیا جاتا ہے، انہوں نے کہا کہ ٹل پاراچنار روڈ پاراچنار کے پرامن عوام کے لیے واحد راستہ ہے جسے مزید چیک پوسٹوں کے ذریعے محفوظ بنانا انتظامیہ کی اولین ذمہ داری بنتی ہے، تکفیری سوچ پر مبنی ملک دشمن اور علاقے کی پر امن فضاء کو سبوثاز کرنے والوں کو فی الفور کیفر کردار تک پہنچایا جائے
