لاہور، حماس کے سربراہ اسماعیل ہانیہ آج غزہ مارچ سے خطاب کریں گے

شیعہ نیوز: جماعت اسلامی کا فلسطینیوں سے اظہار یکجہتی کیلئے لاہور میں غزہ مارچ آج ہو رہا ہے۔ غزہ مارچ پنجاب یونیورسٹی کیمپس کی نہر کے پل پر منعقد کیا جائے گا۔ مارچ کے حوالے سے تمام تر تیاریاں مکمل کرلی گئی ہیں۔ غزہ مارچ کے سٹیج کی تیاریاں جاری ہیں جبکہ شرکا کیلئے 20 ہزار کرسیاں لگا دی گئی ہیں۔ غزہ مارچ میں شرکت کیلئے بڑا جلوس بھیکھے وال موڑ سے برکت مارکیٹ چوک پہنچے گا، جبکہ تحریک بیداری امت مصطفیٰ کا قافلہ کلمہ چوک سے براستہ فیروز پور روڈ مسلم ٹاون موڑ پہنچے گا اور وہاں سے براستہ کینال روڈ کیمپس پل جائے گا۔

مارچ کا آغاز دوپہر ایک بجے ہوگا۔ حماس کے سربراہ اسماعیل ہانیہ غزہ مارچ سے آن لائن خطاب کرینگے۔ حماس کے رہنما ڈاکٹر نواف تکروری غزہ مارچ میں شریک ہونگے۔ بھیکے وال سے آنیوالے مارچ کی قیادت امیر جماعت اسلامی سراج الحق کریں گے جبکہ  کلمہ چوک سے آنیوالے مارچ کی قیادت علامہ سید جواد نقوی کریں گے۔ شرکاء غزہ مارچ کی آمد کا سلسلہ شروع ہو گیا ہے۔ امیر جماعت اسلامی سراج الحق 4 بجے شام خطاب کریں گے۔ ان سے قبل مختلف شیعہ سنی جماعتوں کے قائدین خطاب کریں گے اور فلسطین کے مظلوم مسلمانوں کیساتھ اظہاریکجہتی کریں گے۔