کراچی میں ٹی ٹی پی کے دہشت گردوں کا بڑا نیٹ ورک بے نقاب
شیعہ نیوز: سیکیورٹی فورسز اور قانون نافذ کرنے والے اداروں نے بڑی کامیاب کارروائی کرتے ہوئے کراچی سے اہم دہشت گرد کمانڈرز سمیت 17 دہشت گردوں کو گرفتار کرلیا۔ تفصیلات کے مطابق کراچی میں تحریک طالبان پاکستان (ٹی ٹی پی) کے دہشت گردوں کا بڑا نیٹ ورک بے نقاب ہوگیا۔ انٹیلی جنس ایجنسیز نے بروقت کارروائی کرتے ہوئے دہشت گردوں کے عزائم کو ناکام بناتے ہوئے کراچی سے اہم دہشت گرد کمانڈرز سمیت 17دہشت گردوں کو گرفتار کرلیا۔ ٹی ٹی پی کے دہشت گرد کراچی میں دہشت گردانہ کارروائیوں کی منصوبہ بندی کر رہے تھے۔ یہ دہشت گرد ٹارگٹ کلنگ اور بھتہ وصولی جیسے سنگین جرائم میں قانون نافذ کرنے والے اداروں کو مطلوب تھے۔ ان دہشت گردوں کو افغانستان سے ٹی ٹی پی کی قیادت کی سرپرستی میں مدرسہ طالب علم کے روپ میں منظم کیا گیا تھا، گرفتار دہشت گرد 2007ء تا 2014ء تک ٹی ٹی پی نیٹ ورک کا حصہ تھے اور سوات/مالاکنڈ میں سیکورٹی فورسز اور این جی اوز پر مختلف حملوں میں ملوث تھے۔
یہ دہشت گرد کراچی میں فرقہ وارانہ، نسلی، سیاستدانوں کی ٹارگٹ کلنگ اور قانون نافذ کرنے والے اداروں پر حملوں میں بھی ملوث تھے۔ یہ نیٹ ورک افغانستان میں ٹی ٹی پی کی اعلی قیادت کے لئے بھتہ خوری کی سرگرمیوں اور اغوا برائے تاوان کے ذریعے فنڈز اکھٹا کرتا تھا، اس نیٹ ورک نے مدرسے میں خودکش بمباروں کو بھی پناہ دی تھی، جنہیں افغانستان سے کراچی اور ملک کے دیگر حصوں میں دہشت گردی کی مختلف سرگرمیوں میں استعمال ہونا تھا۔ اس سلسلے میں حساس تنصیبات، اعلیٰ سطحی عہدیداران اور ملٹی نیشنل کمپنیوں کے تاجروں/ملازمین کے خلاف بھتہ خوری سے بچنے کے لئے بہترین اقدامات بروے کار لائے جا رہے ہیں۔ سیکیورٹی فورسز اور قانون نافذ کرنے والے اداراے پاکستانی عوام کی مکمل حمایت سے دہشت گردوں کے مذموم عزائم کو خاک میں ملانے کے لئے پرعزم ہیں۔
