مولانا فضل الرحمان کل کابل جائیں گے، کالعدم ٹی ٹی پی سمیت دیگر امور پر بات ہوگی

شیعہ نیوز:جمعیت علمائے اسلام (جے یو آئی) کے سربراہ مولانا فضل الرحمان کل افغانستان کا دورہ کریں گے۔ ذرائع کے مطابق مولانا فضل الرحمان افغان حکومت کی دعوت پر کابل کا دورہ کر رہے ہیں اور سابق رکن قومی اسمبلی مولانا جمال الدین محسود بھی ان کے ہمراہ ہوں گے۔ ذرائع نے بتایا کہ دورے کے دوران پاک افغان تعلقات پر تبادلہ خیال کیا جائے گا۔ ذرائع کا کہنا ہے کہ افغان حکام سے کالعدم تحریک طالبان پاکستان (ٹی ٹی پی) سمیت دیگر امور پر بات چیت کی جائے گی۔ ذرائع کے مطابق دورے میں افغان سرزمین کے پاکستان کے خلاف مسلسل استعمال پر بھی بات ہوگی۔

دوسری جانب ایک نجی ٹی وی چینل کے پروگرام میں بات کرتے ہوئے دورہ افغانستان سے متعلق مولانا فضل الرحمان نے کہا ہے کہ دورہ افغانستان کے لیے حکومت پاکستان کا مکمل مینڈیٹ حاصل ہے۔ انہوں نے کہا کہ میں مذاکرات کا قائل ہوں، مگر ٹی ٹی پی سے مذاکرات کے لیے زمینی حقائق دیکھ کر ہی کسی جامع حکمت عملی کی طرف بڑھا جاسکتا ہے۔ خیال رہے کہ 16 دسمبر 2023ء کو افغانستان کے پاکستان میں تعینات عبوری سفیر سردار احمد جان شکیب نے جمعیت علمائے اسلام (جے یو آئی) کے سربراہ مولانا فضل الرحمان سے ملاقات کی تھی اور انہیں دورہ کابل کی دعوت دی تھی۔ افغان دورے کی دعوت کی تصدیق افغان حکومت کے ترجمان ذبیح اللہ مجاہد نے بھی کی تھی۔