تفتان بارڈر سے لاپتہ ہونے والےعلامہ مظہر کاظمی بازیاب، بحفاظت گھر پہنچ گئے

شیعہ نیوز (پاکستانی شیعہ خبر رساں ادارہ) جوائنٹ ایکشن کمیٹی فار شیعہ مسنگ پرسنز کی کوششوں سے تفتان بارڈر سے اغواء کے بعد لاپتہ ہونے والے معروف عالم دین علامہ مظہر کاظمی اپنے شاگردحیدر عباس سمیت بازیاب ہو کر با حفاظت اپنے گھر پہنچ گئے ہیں۔

علامہ سید مظہر حسین کاظمی اور ان کے شاگرد حیدر عباس کو 29 جون کو پاکستان سے ایران واپس جاتے ہوئے تفتان بارڈر پرسادہ لباس اہلکاروں نے اغواء کر کے جبری طور پر لاپتہ کردیا تھا۔

علامہ سید مظہر حسین کاظمی شعبہ تعلیم و تربیت سے تعلق رکھنے والی پاکستان کی معروف علمی ومذہبی شخصیت ہیں۔علامہ سید مظہر حسین کاظمی جامعہ بعثت کے بانی اور مہتمم رہے ہیں۔ انہوں نے پاکستان میں دسیوں تعلیمی اداروں کی بنیاد رکھی۔وہ کاروان امت جیسے مقدس مشن کے سربراہ ہیں۔

یہ خبر بھی پڑھیں اتحاد کی دعوت دینے والوں کیخلاف مقدمات کسے خوش کرنے کیلئے بنائے جارہے ہیں، علامہ حسن ظفر نقوی

علامہ سید مظہر کاظمی مجلس وحدت مسلمین پاکستان کے بانی اراکین اور شوری عالی کے ممبر رہے ہیں۔ وہ سالہا سال امامیہ اسٹوڈنٹس آرگنائزیشن کی مرکزی نظارت میں بھی رہے ہیں۔ ان کے علمی اور مذھبی موضوعات پر خطابات ہزاروں بلکہ لاکھوں افراد کو راہ ولایت کے قریب لاچکے ہیں۔

واضح رہے کہ علامہ سید مظہر حسین کاظمی ان دنوں دینی علوم کے حصول و ترویج کے سلسلے میں ایران کے شہر قم میں مقیم تھے وہ لاپتہ کیے جانے سےچند روز قبل اپنے چھوٹے بھائی علامہ سید اظہر حسین کاظمی کے انتقال کے بعد پاکستان تشریف لائے تھے اور واپس ایران جاتے ہوئےراستے سے لاپتہ کردیئے گئے تھے۔