مودی حکومت 1947ء جیسے فسادات کروانا چاہتی ہے، محبوبہ مفتی

شیعہ نیوز: مقبوضہ جموں و کشمیر میں پیپلز ڈیموکریٹک پارٹی کی صدر محبوبہ مفتی نے نریندر مودی کی زیر قیادت بھارتیہ جنتا پارٹی کی ہندوستانی حکومت کو تنقید کا نشانہ بناتے ہوئے کہا ہے کہ مودی حکومت 1947ء جیسے فسادات کروانا چاہتی ہے۔

ذرائع کے مطابق محبوبہ مفتی نے جموں میں پارٹی کارکنوں کے ایک اجتماع سے خطاب میں کہا کہ بی جے پی حکومت لوگوں کو مذہب کی بنیاد پر ایک دوسرے کے خلاف کر رہی ہے۔ انہوں نے کہا کہ مودی حکومت لوگوں کو روزگار، تعلیم، ہسپتال اور سڑکیں فراہم کرنے میں ناکام رہی ہے لہذا اب یہ مساجد کے نیچے مندروں کو تلاش کرنے کے بہانے لوگوں کی توجہ ہٹانے کی کوشش کر رہی ہے۔

یہ بھی پڑھیں: جی بی حکومت 5 سال قبل جاری کیے گئے نئے اضلاع کے نوٹیفکیشن پر عملدرآمد نہ کروا سکی

محبوبہ مفتی نے کہا کہ اترپردیش کے ضلع سنبھل میں حال ہی میں متعدد بے گناہ جوانوں کو مار دیا گیا اور جو بھی اس بہیمانہ واقعے کے خلاف بولنے کی کوشش کرے گا اسے عمر خالد کی طرح جیل میں ڈال دیا جائے گا، موجودہ حالات میں کوئی سننے والا نہیں ہے۔

انہوں نے کہا کہ اجمیر شریف کی درگاہ کے حوالے سے بھی دعوی ٰ کیا گیا کہ یہ شیومندر پر تعمیر کی گئی ہے، مسلمانوں کے ساتھ ساتھ ہندو، سکھ سمیت اور دیگر مذاہب کے لوگ 800 سال پرانی درگاہ پر جاتے ہیں لیکن یہ لوگ مندر کی تلاش میں اس عظیم درگاہ کو بھی کھودنا چاہتے ہیں۔

محبوبہ مفتی نے کہا کہ لوگوں کو اس سب کے خلاف متحد ہو کر لڑنے کی ضرورت ہے۔ محبوبہ مفتی نے مزید کہا کہ اگرچہ مقبوضہ جموں و کشمیر میں نیشنل کانفرنس اور کانگریس کی اتحادی حکومت ہے لیکن اصل میں بی جے پی کی ہندوستانی حکومت لیفٹیننٹ گورنر کے ذریعے یہاں حکومت کر رہی ہے۔