عزاداری امام حسین علیہ السلام جرم نہیں عبادت ہے، علامہ مقصود ڈومکی
شیعہ نیوز:مجلس وحدت مسلمین پاکستان کے مرکزی رہنما علامہ مقصود علی ڈومکی اور صوبائی صدر ایم ڈبلیو ایم بلوچستان علامہ سید ظفر عباس شمسی ضلع صحبت پور کے ایک روزہ تنظیمی دورے پر ضلع صحبت پور پہنچے۔ انہوں نے بھنڈ شہر کی مسجد و امام بارگاہ اور شہر کا دورہ کیا جو ابھی تک پانی میں ڈوبا ہوا ہے۔ انہوں نے صحبت پور سٹی میں ضلعی شوری کے اجلاس میں شرکت کی۔ اس موقع پر میڈیا سے گفتگو کرتے ہوئے علامہ مقصود علی ڈومکی نے کہا کہ سیلاب سے متاثرہ اضلاع میں ابھی تک لاکھوں لوگ سڑکوں پر بیٹھے ہوئے ہیں۔ حکومت ان علاقوں سے اب تک نہ تو پانی نکال سکی ہے اور نہ ہی متاثرین کو خیمے اور راشن دے سکی ہے۔ انہوں نے کہا کہ صحبت پور میں عزاداروں کے خلاف عزاداری اور چہلم امام حسین علیہ السلام کے جرم میں ایف آئی آرز کا اندراج شرمناک حرکت تھی اور اس سے زیادہ شرمناک حرکت ایک عزادار کو گرفتار کر کے ایس ایچ او کا اسے مفرور مجرم کی گرفتاری قرار دے کر تشہیر کرنا سنگین غلطی تھی۔
عزاداری امام حسین علیہ السلام جرم نہیں عبادت ہے۔ ہم ایسی ایف آئی آرز کو پاؤں تلے روندیں گے جو چہلم شہدائے کربلا کے خلاف ہوں۔ انہوں نے اعلان کیا کہ صحبت پور شہر میں چہلم شہدائے کربلا کا سالانہ جلوس عزا آئندہ سال بھی برآمد ہوگا۔ اس موقع پر علامہ سید ظفر عباس شمسی نے بھی میڈیا سے گفتگو کی۔ انہوں نے کہا کہ صحبت پور کے مومنین اور عزاداروں کے حوصلے بلند ہیں اور مجلس وحدت مسلمین ہر منزل پر عزاداروں کے شانہ بشانہ نظر آئے گی۔ اس موقع پر ایم ڈبلیو ایم ضلع صحبت پور کی ضلعی شوریٰ کا اجلاس منعقد ہوا۔ جماعتی الیکشن کے نتائج کی روشنی میں سید شاہد حسین شاہ جیلانی کو ضلعی صدر منتخب کیا گیا۔ اس موقع پر سید مہر شاہ کی امام بارگاہ پر متاثرین سیلاب میں مجلس وحدت مسلمین کی جانب سے راشن تقسیم کیا گیا۔
