کالعدم ٹی ٹی پی سے مذاکرات کیلئے ریاستی وفد کی قیادت مفتی تقی عثمانی کریں گے
شیعہ نیوز (پاکستانی شیعہ خبر رساں ادارہ) ہزاروں پاکستانیوں کے قاتل اور اسلام کے چہرے کو دنیا بھر میں مسخ کرنے والے دہشتگرد ٹولے کالعدم ٹی ٹی پی سے ریاست پاکستان ایک بار پھر مذاکرات کررہی ہے۔
تفصیلات کے مطابق ریاست پاکستان جنگ بندی میں توسیع کے معاملے پر کالعدم تحریک طالبان پاکستان (ٹی ٹی پی) کے مؤقف میں نرمی پیدا کرنے کے لیے علمائے کرام کا ایک وفد افغانستان بھیجے گی۔
مذکورہ فیصلہ ایسے وقت پر کیا گیا ہےجب حال ہی میں قبائلی جرگہ کالعدم ٹی ٹی پی کو جنگ بندی میں توسیع کے لیے آمادہ نہیں کرسکا۔ واضح رہے کہ مذاکرات طالبان حکومت کی ثالثی میں ہوئے تھے۔
یہ خبر بھی پڑھیں کھارادر بم دھماکے میں ملوث پولیس اہلکار کے تہلکہ خیز انکشافات
ذرائع کے مطابق 13 رکنی وفد میں ملک کے معروف مدارس کے علمائے شامل ہوں گے اور یہ چند روز میں افغان دارالحکومت کا دورہ کرے گا۔ مفتی تقی عثمانی اس وفد کی سربراہی کریں گے، جس میں حقانی نیٹ ورک کے ساتھ مضبوط روابط رکھنے والے خیبر پختونخوا کے علمائے کرام بھی شامل ہوں گے۔
علماء کا وفد کابل میں ٹی ٹی پی کی قیادت سے آمنے سامنے ملاقات کرے گا۔ علماء جنگ بندی کو مزید موثر بنانے کے لیے افغانستان کے عبوری وزیر داخلہ سراج الدین حقانی کی مدد بھی حاصل کرنے کی کوشش کریں گے۔ وفد ٹی ٹی پی کو اس بات پر قائل کرنے کی کوشش کرے گا کہ وہ سابقہ فاٹا اصلاحات کے رول بیک کے اپنے مطالبے سے دستبردار ہو جائے، وفاقی حکومت کے مطابق موجودہ مذاکراتی عمل کو سول اور فوجی رہنماؤں کی حمایت حاصل ہے۔
واضح رہے کہ ریاست کے خلاف ہتھیار اٹھانے والوں اور ہزاروں پاکستانیوں کے قاتلوں سے ریاست مذاکرات کررہی ہے جبکہ ریاستی سیکیورٹی ادارےمحب وطن شیعہ جوانوں کو گھروں سے اٹھا کر لاپتہ کررہے ہیں۔
یاد رہے کہ کالعدم ٹی ٹی پی سے اس سے قبل بھی ریاستی سطح پر مذاکرات ہوتے رہے ہیں اور اس بہانے کالعدم ٹی ٹی پی کے کئی دہشتگرد رہا کئے جاچکے ہیں تاہم اس سب کے باوجود اس دہشتگرد گروہ کی کاروائیاں جاری ہیں اور ملکی سیکیورٹی کے ذمہ دار ریاستی ادارے ان کا صفایا کرنے کے بجائے تاحال ان سے جنگ بندی کیلئے مذاکرات کرتے آرہے ہیں۔
