ظلم کے مقابل قیام کیلئے جوان کے جذبہ اور بزرگوں کی بصیرت درکار ہے، ناصر شیرازی

شیعہ نیوز: امامیہ اسٹوڈنٹس آرگنائزیشن پاکستان لاہور ڈویژن کے زیر اہتمام یونیورسٹیوں کے طلباء کے لئے ’’نیکسٹ جنریشن سمٹ‘‘ کا انعقاد کیا گیا، جس سے مجلس وحدت مسلمین پاکستان کے مرکزی جنرل سیکرٹری، سنٹر فار پاکستان اینڈ گلف سٹڈیز کے صدر سید ناصر عباس شیرازی نے خصوصی خطاب کیا۔ اس موقع پر کثیر تعداد میں طلبا موجود تھے۔ سید ناصر عباس شیرازی نے جوان کو مستقبل کی امید قرار دیا اور ایک قرآنی جوان کی خصوصیات بیان کیں۔ انہوں نے معنویت، ذمہ داری، احساس، ایثار اور دین کے لئے قربانی کے جذبے کو جوان کی خصوصیات کے طور پر بیان کیا۔ ان کا کہنا تھا کہ ظلم کے مقابل قیام کے لئے جوان کے جذبہ اور بزرگوں کی بصیرت درکار ہے، آج کے دور میں جوان وہ نہیں ہے جو عمر کے لحاظ سے جوان ہو بلکہ جوان وہ ہے جو ان صفات کا حامل ہو اور معاشرے سے ظلم اور فساد کے خاتمہ کے عمل میں متحرک ہو۔

ان کا کہنا تھا کہ قرآنی جوان وہ ہے جو مہدی آخر عج کا عملی منتظر ہے، جو بین الاقوامی امور پر گہری نگاہ رکھتا ہے اور جو ملکی سطح پر مثبت اقدار کو فروغ دینے اور عدل کے قائم کرنے میں اپنا کردار ادا کر رہا ہو۔ انہوں نے آئی ایس او کو جوانوں کی معنوی امنگوں کا ترجمان قرار دیا اور تعلیمی عمل کے دوران تنطیم سے وابستگی کی اہمیت بیان کی۔ سمٹ کے دوسرے مقرر معروف موٹیویشنل سپیکر قیصر عباس تھے، جنہوں نے لیڈر شپ کے بنیادی اصول بیان کئے۔ آخر میں سوالات و جوابات کا سیشن تھا جس میں طلباء نے بھرپور دلچسپی ظاہر کی۔ مہمانوں کو پھولوں کے گلدستے اور اعزازی شیلڈز پیش کی گئیں۔