پاکستانی قوم وطن کو ایک آزاد اور خودمختار ملک دیکھنا چاہتی ہے

شیعہ نیوز (پاکستانی شیعہ خبر رساں ادارہ) مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی کی علماء کرام اور تنظیمی ذمہ داران کے ہمراہ ملتان پریس کلب میں پریس کانفرنس۔

پریس کانفرنس سے خطاب کرتے ہوئے علامہ مقصود علی ڈومکی نے کہا کہ پاکستانی قوم اغیار کی غلامی سے بیزار ہے اور پاک وطن کو ایک آزاد اور خودمختار ملک دیکھنا چاہتی ہے۔ وطن عزیز پاکستان امریکہ کی کالونی نہیں یہ 22 کروڑ غیرت مند مسلمانوں کا ملک ہے۔ مجلس وحدت مسلمین پاکستان کا یہ اصولی موقف ہے کہ امریکہ شیطان بزرگ ہے اور اس کی وطن عزیز پاکستان میں مبینہ مداخلت قابل مذمت ہے۔ ہم ملکی استقلال آزادی اور تعمیر و ترقی کے حامی ہیں۔

انہوں نے کہا کہ وفاقی اور صوبائی حکومتیں نصاب تعلیم سے متعلق ملت جعفریہ کے تحفظات دور کریں اور متنازعہ نصاب تعلیم کو زبردستی مسلط کرنے سے اجتناب کریں۔ پاکستان میں بسنے والے سات کروڑ شیعہ مسلمان ملک کی دوسری بڑی اکثریت ہیں ان کو دیوار سے لگانے کا عمل ناقابل قبول ہے۔انہوں نے کہا کہ پنجاب پولیس نے عزاداروں کے خلاف ناجائز مقدمات درج کئے حکومت ان مقدمات کو واپس لیتے ہوئے آئندہ ایسے ناجائز مقدمات سے پرہیز کرے۔

مجلس علمائے شیعہ جنوبی پنجاب کے صوبائی صدر علامہ قاضی نادر علوی ،ایم ڈبلیو ایم ملتان کے صدر علامہ وسیم معصومی، صوبائی سیکرٹری تنظیم سید دلاور رضا زیدی ،برادر آصف رضا ،برادر محمود الحسن ،برادر سخاوت حسین بھی پریس کانفرنس میں شریک تھے۔