پاسپورٹ کے حامل مستحق افراد کو احساس پروگرام کا حصہ بنایا جائے

شیعہ نیوز (پاکستانی شیعہ خبر رساں ادارہ) شیعہ علماء کونسل خیبر پختونخوا کے صدر علامہ حمید امامی نے کہا ہے کہ پاسپورٹ کے حامل شہریوں کو احساس پروگرام میں شامل نہ کرنا درست نہیں، حکومت فوری طور پر اس شرط کو ختم کرے۔

اپنے ایک بیان میں ایس یو سی خیبر پختونخوا کے سربراہ کا کہنا تھا کہ وزیراعظم پاکستان فوری طور پر احساس پروگرام میں پاسپورٹ کی شرط ختم کریں، چونکہ 80 فیصد لوگ بیرونی ممالک میں کورونا وائرس سے متاثر ہو کر پاکستان واپس آئے ہیں، اسی طرح بہت ساری خواتین اور غریب افراد اپنی بھیڑ بکریاں اور فصلیں وغیرہ فروخت کرکے زیارات مقدسہ و عمرہ کیلئے جاتے ہیں۔

انہوں نے مزید کہاکہ بہت سارے جوانوں نے بیرونی ممالک جانے کی غرض سے اپنےپاسپورٹ بنوائے ہیں، لہذا پاسپورٹ بنانا امیر ہونے کی دلیل نہیں، حکومت پاسپورٹ کے حامل مستحق افراد کو بھی احساس پروگرام کا حصہ بنائے۔