شمالی وزیرستان: طالبان دہشت گردوں کی فائرنگ سے شیعہ انجینئر سمیت 4 افراد شہید

شیعہ نیوز : شمالی وزیرستان میں ٹارگٹ کلنگ کی سفاکانہ کارروائی ،کالعدم تحریک طالبان پاکستان کے دہشت گردوں کےہاتھوں شیعہ انجینئر ظفرعباس شاہ سمیت 4 پاکستانی شہید۔

تفصیلات کے مطابق سید ظفر عباس شاہ انجینئر نیسپاک اور متولی تھلہ فضل شاہ ڈیرہ اسماعیل خان اپنے تین ساتھیوں سمیت آج شمالی وزیرستان میںکالعدم تحریک طالبان پاکستان کے دہشت گردوں کے حملے میں شہید ہو گئے۔

ذرائع کے مطابق ایف ڈبلیواو سے تعلق رکھنے والے 4 افسران ایک گاڑی میں جارہے تھے کہ ان پر مسلح دہشت گردوں نے اندھا دہند فائرنگ کردی جس کے نتیجے میں گاڑی میں سوار سید ظفرعباس شاہ اور ان کے ساتھی موقع پرہی شہید ہوگئے۔

باقی مقتولین کا تعلق میر علی، ایبٹ آباد اور گوجرانولہ سے ہے۔ ڈی پی او شفیع اللہ گنڈہ پور کے مطابق واقعہ کی تحقیقات شروع کر دی گئی ہیں اور حملہ آوروں کی تلاش و گرفتاری کے لئے سرچ آپریشن بھی شروع کر دیا گیا ہے۔

مقتولین کی لاشیں میر علی ہسپتال میں پوسٹ مارٹم کی غرض سے منتقل کر دی گئی ہیں جہاں ڈاکٹرز سے چاروں افراد کی شہادت کی تصدیق کردی۔جبکہ پولیس کی مختلف ٹیمیں وقوعہ کا مختلف پہلوؤں سے جائزہ لیکر باریک بینی سے تحقیقات کر رہی ہیں۔

واضح رہے سعودی اور بھارتی ایجنٹ پاکستان کو ایک مرتبہ پھر غیر مستحکم کرنے کیلئے اوچھے ہتھکنڈوں پر اتر آئے ہیں۔ ایک جانب اسرائیل کے ناجائز وجود کو تسلیم کرنے کیلئے دباؤ ڈالا جارہا ہے دوسری جانب اس طرح کی دہشت گردانہ کاروائیاں انجام دی جارہی ہیں۔