عراق میں پھنسے پاکستانی زائرین کراچی پہنچ گئے

شیعہ نیوز: عراق میں بغداد ایئرپورٹ پر کئی گھنٹوں سے پھنسے پاکستانی زائرین کراچی ایئر پورٹ پہنچ گئے۔ بغداد ایئر پورٹ پر پھنسے پاکستانی زائرین عراقی ایئر ویز کی پرواز آئی اے 2431 کے ذریعے کراچی ایئرپورٹ پہنچ گئے۔ عراقی ایئر ویز کی پرواز آئی اے 2431 پاکستانی زائرین کو لے کر ہفتہ کی صبح 6 بج کر 15 منٹ پر کراچی ایئر پورٹ پہنچی۔ پاکستان پہنچنے والے زائرین میں مشہور نوحہ خواں شاہد حسین بلتستانی بھی شامل تھے۔ زائرین کی آمد سے قبل گورنر سندھ کامران خان ٹیسوری نے کہا تھا کہ ان سے رکن قومی اسمبلی انجینئر حمید حسین نے ملاقات کرکے مسئلہ کی طرف توجہ دلائی تھی جس پر انہوں نے عراقی سفیر سے بات کی تھی۔

دفتر خارجہ کے مطابق عراق ایئر ویز کے دو طیاروں میں فنی خرابی کے باعث 654 پاکستانی زائرین بغداد ایئرپورٹ پر پھنس گئے تھے۔ وفاقی وزیر مذہبی امور چوہدری سالک حسین نے معاملے سے متعلق عراق میں پاکستانی سفیر ذیشان احمد کو فون کیا تھا۔ پاکستانی سفیر نے کہا کہ پاسپورٹ گم ہونے کی خبروں میں کوئی صداقت نہیں، صورتحال ٹورازم کمپنیوں کی بے انتظامی کے باعث پیدا ہوئی۔ ذرائع نے بتایا کہ زائرین کی دوسری پرواز بھی جلد پاکستان پہنچ جائے گی۔ واضح رہے کہ بغدار ایئرپورٹ پر 654 پاکستانی زائرین پھنس گئے تھے۔