فلسطینی مقاومت کے اسرائیل پر میزائل حملے، متعدد صیہونی زخمی
شیعہ نیوز (پاکستانی شیعہ خبر رساں ادارہ) فلسطین کی تحریک مزاحمت کے سپاہیوں نے پیر کو غزہ پر صیہونی حکومت کے فضائی حملے کے جواب میں سدیروت صیہونی کالونی پر تین میزائل فائر کئے ۔
فلسطینیوں کے اس میزائلی حملے میں متعدد صیہونیوں کے زخمی ہونے کی خبر ہے۔
اس دوران اسرائیلی فوج کے ترجمان اویخای ادرئی نے ایک بار پھر فلسطینیوں کے میزائلی حملوں کو روکنے میںآئرن ڈوم اینٹی میزائل سسٹم کی ناکامی کا ایک بار پھر اعتراف کیا ہے۔
اسرائیلی فوج کے ترجمان نے کہا ہے کہ شمال مشرقی غزہ سے صیہونی کالونیوں پر تین میزائل فائر کئے گئے جن میں سے ایک میزائل آئرن ڈوم کے فعال ہونے کے باوجود سدیروت پر لگا ہے۔
اسرائیلی فوج کے ترجمان نے کہا کہ فلسطینیوں کے اس میزائلی حملے میں کم سے کم دو صیہونی زخمی ہوگئے جبکہ بہت سے خوف سے حواس باختہ ہوگئے جنہیں اسپتال لے جانا پڑا۔
قابل ذکر ہے کہ ادھر چند ہفتے سے غاصب صیہونی حکومت ہر چند روز بعد غزہ پر فضائی حملہ یا گولہ باری کردیتی ہے ۔
صیہونی حکومت کے فضائی حملوں اور گولہ باری میں درجنوں فلسطینی شہید اور زخمی ہوچکے ہیں۔
