قابض صیہونی دشمن کے خلاف اب کھلی جنگ ہوگی۔ اسماعیل ھنیہ
شیعہ نیوز (پاکستانی شیعہ خبر رساں ادارہ) اسلامی تحریک مزاحمت ’’حماس‘‘ کے سیاسی شعبے کے سربراہ اسماعیل ھنیہ نے کہا ہے کہ قابض صیہونی دشمن کے خلاف ہماری جنگ زمان ومکان کی قید سے آزاد ہے۔ اب دشمن کے خلاف ہر محاذ پر کھلی جنگ ہوگی۔
رپورٹ کے مطابق اسلامی جہاد کے شہید کمانڈر بہاء ابو العطاء کی تعزیت کے حوالے سے منعقدہ ایک تقریب سے خطاب کرتے ہوئے حماس رہنما نے کہا کہ غزہ پر اسرائیلی فوج کا حالیہ حملہ نہ تو پہلا ہے اور نہ ہی آخری ہے۔ صیہونی دشمن آئندہ بھی نہتے فلسطینیوں کے خلاف ننگی جارحیت کا مظاہرہ جاری رکھےگا۔ دشمن کے خلاف ہماری طرف سے جوابی کارروائی بھی جارے رہے گی۔
انہوں نے اسلامی جہاد کے کمانڈر ابو العطاء کی جہاد فلسطین کے لیے خدمات کو شاندار خراج عقیدت پیش کیا۔
ان کا کہنا تھا کہ فلسطینی مزاحمتی فورسز پر مشتمل مشترکہ کنٹرول روم نے دفاعی اور جنگی تیاریوں کے میدان میں اہم پیش قدمی کی ہے۔ دشمن کو جنگ کے بہت سے پہلوؤں پر حیران کیا گیا۔
اسماعیل ھنیہ نے کہا کہ فلسطینی قوم کے ایک ایک شہید اور اس کے خون کے ایک ایک قطرے کا حساب لیا جائے گا۔ آخری فتح ہماری ہوگی اور شکست دشمن کا مقدر ہوگی۔
انہوں نے کہا کہ اسلامی جہاد اور حماس اور دونوں جماعتوں کے عسکری بازو القدس بریگیڈ اور القسام بریگیڈ مضبوط رشتے میں ایک دوسرے کے ساتھ باندھے ہوئے ہیں۔
فلسطینی تنظیم جہاد اسلامی کے سیاسی شعبہ کے سربراہ یوسف حساینہ نے کہا ہے کہ جہاد اسلامی اور حماس کے تعلقات مضبوط اور مستحکم ہیں۔
جہاد اسلامی کے سیاسی شعبہ کے سربراہ نے کہا کہ اسرائیل کو فلسطینی جہادی گروہوں کے درمیان اختلافات ڈالنے کی اجازت نہیں دی جائےگی۔
