قبلہ اوّل کی آزادی تک ہتھیار اُٹھائے رکھیں گے۔ محمود الزھار

شیعہ نیوز (پاکستانی شیعہ خبر رساں ادارہ) حماس کے سیاسی شعبے کے سینیر رکن اور سابق فلسطینی وزیرخارجہ ڈاکٹر محمود الزھار نے کہا ہے کہ مسجد اقصیٰ کی پنجہ یہود سے آزادی تک فلسطینی قوم ہتھیار نہیں پھینکے گی۔ جب تک پوری مسلم امہ کے مسلمان قبلہ اوّل میں نماز اورعبادت کا حق حاصل نہیں کرلیتے اس وقت تک حماس بندوق اُٹھائے رکھے گی۔

رپورٹ کے مطابق حماس رہنما نے ان خیالات کا اظہار یمن کے دارالحکومت صنعاء میں عظیم الشان دفاع فلسطین مارچ سے ٹیلیفونک خطاب میں کیا۔

انہوں نے کہا کہ یمن میں عوام کی اتنی بڑی تعداد کا دفاع قبلہ اوّل کے لیے گھروں سے نکلنا اس بات کا ثبوت ہے کہ یمنی قوم فلسطینیوں کے ساتھ کھڑی ہے۔

خیال رہے کہ گذشتہ روز صنعاء میں فلسطینیوں کی حمایت اور امریکہ اور اسرائیل کے نام نہاد امن منصوبے ’’صدی کی ڈیل‘‘ کے خلاف عظیم الشان ملین مارچ منعقد کیا گیا جس میں لاکھوں افراد نے شرکت کی۔

یمن میں ہونے والے دفاع فلسطین مارچ سے خطاب کرتے ہوئے حماس رہنما نے یمنی قیادت اور قوم کو فلسطینیوں کی حمایت کے اظہار پران کا شکریہ ادا کیا۔

انہوں نے کہا کہ پوری دنیا اس وقت فلسطینیوں کے ساتھ ہونے والی امریکی اور صیہونی نا انصافیوں پریک آواز ہے۔ یمنی عوام کا سڑکوں پرنکل کرٹرمپ کے خلاف احتجاج کرنا امریکی ۔ صیہونی سازشوں پر زور دار طمانچہ ہے۔

محمود الزھار کا کہنا تھا کہ امریکہ اور اسرائیل کی طرف سےمکروہ شیطانی چالوں کے باوجود فتح و نصرت فلسطینی قوم کا مقدر ہوگی۔

خیال رہے کہ 28 جنوری کو امریکی صدر ڈونلڈ ٹرمپ نے مشرق وسطیٰ کے لیے اپنے نام نہاد امن منصوبے کا اعلان کیا تھا۔ اس منصوبے میں اسرائیلی ریاست کے ساتھ ایک برائے نام فلسطینی مملکت کا بھی تصور پیش کیا ہے۔