قبلہ اوّل پر صیہونیوں کے دھاوے آتش فشاں بن کر پھٹ سکتے ہیں
شیعہ نیوز (پاکستانی شیعہ خبر رساں ادارہ) اسلامی جہاد نے اسرائیل کی ریاستی سرپرستی میں مسجد اقصیٰ کی مسلسل بے حرمتی کے اشتعال انگیز عمل پر شدید تشویش کا اظہار کرتے ہوئے خبردار کیا ہے کہ قبلہ اوّل کی بے حرمتی اور صیہونی آباد کاروں کے دھاوے آتش فشاں بن کر پھٹ سکتے ہیں۔
رپورٹ کے مطابق اسلامی جہاد کی طرف سے جاری ایک بیان میں کہا گیا ہے کہ فلسطینی اور کوئی بھی فلسطینی تنظیم دفاع قبلہ اوّل سے دست بردار نہیں ہوسکتی۔ جماعت نے قوم کے تمام دھاروں پر زور دیا کہ وہ قبلہ اوّل کے دفاع کے لیے اپنی صفوں میں اتحاد پیدا کریں۔
بیان میں مزید کہا گیا ہے کہ قبلہ اوّل کا دفاع نہ صرف فلسطینی قوم کی اجتماعی ذمہ داری ہے بلکہ یہ پورے عالم اسلام کی ذمہ داری ہے۔ فلسطینی قوم قبلہ اوّل کے دفاع کے لیے ہرقربانی دینے کے لیےتیار ہے۔
بیان میں خبردار کیا گیا ہے کہ مسجد اقصیٰ پر صیہونی آبادکاروں کے اشتعال انگیز دھاوے مقدس مقام کے تقدس کو پامال کرنے کی دانستہ سازش ہیں جس کےنتیجے میں فلسطینی قوم میں سخت غم وغصہ پایا جا رہا ہے۔ اگر یہ دھاوے اور مذہبی اشتعال انگیزی جاری رہتی ہے تو فلسطینی قوم کا غم وغصہ آتش فشاں بن کر پھٹ سکتا ہے۔
اسلامی جہاد کا کہنا ہے کہ اسرائیلی ریاست دائیں بازو کے مذہبی انتہا پسند یہودیوں کے ہاتھوں میں یرغمال ہوچکی ہے۔ یہودی مذہبی گروہ آباد کاروں کو آئے روز قبلہ اوّل پردھاوؤں کے لیے ترغیبات دیتے ہیں۔
