کوئٹہ،ایم ڈبلیوایم کے زیر اہتمام شہید اسماعیل ہانیہ کی مظلومانہ شہادت کے خلاف احتجاجی مظاہرہ

شیعہ نیوز: غاصب اسرائیل کے ہاتھوں حماس کے رہنما مجاہد اسلام شہید اسماعیل ہانیہ کی دردناک شہادت کے خلاف مجلس وحدت مسلمین پاکستان کے سربراہ علامہ راجہ ناصر عباس جعفری کی کال پر ملک گیر یوم احتجاج منایا گیا۔ فلسطینیوں کے خلاف جاری اسرائیلی مظالم کے خلاف کوئٹہ میں بھی بعد نماز جمعہ احتجاجی مظاہرہ کیا گیا۔احتجاجی مظاہرے سے مجلس وحدت مسلمین پاکستان کے مرکزی رہنما علامہ مقصود علی ڈومکی صوبائی نائب صدر علامہ علی حسنین اور امام جمعہ کوئٹہ علامہ سید ہاشم موسوی نے خطاب کیا۔

اس موقع پر خطاب کرتے ہوئے علامہ مقصود علی ڈومکی نے کہا کہ شہید اسماعیل ہانیہ نڈر شجاع اور عاشق شہادت تھے۔ آپ نے اپنے بیٹوں اور پوتوں سمیت خاندان کے ستر عزیز راہ خدا اور مسجد اقصیٰ و فلسطین کی آزادی کے لئے قربان کئے۔ بزدل دشمن نے رات کی تاریکی میں ایک عظیم رہنما کو دھشت گردی کا نشانہ بنایا۔ پوری امت مسلمہ فلسطینی عوام حماس اور تحریک آزادی فلسطین کے ساتھ ہے۔

یہ بھی پڑھیں: ایران صہیونی نیٹ ورک کو سزا دینے کا حق ضرور استعمال کرے گا، علی باقری کنی

علامہ علی حسنین نے کہا کہ فلسطین کا معرکہ حق و باطل کا معرکہ ہے اور ہم مظلوم فلسطینیوں کی جدوجہد آزادی کی مکمل حمایت کرتے ہیں۔علامہ سید ہاشم موسوی نے کہا کہ شہید اسماعیل ہانیہ شوق شہادت سے سرشار تھے اسی لئے وہ شہادت کی تمنا میں جیتے رہے۔ اسماعیل ہانیہ نے اپنی شہادت سے چند روز قبل شہید ق ا س م س ل ی م ا ن ی کی قبر مبارک پر جا کر لکھا کہ اب شہادت اور ملاقات کا وقت آن پہنچا ہے۔احتجاجی مظاہرے میں کوئٹہ کے علماء کرام مجلس وحدت مسلمین کے رہنما علامہ سہیل اکبر شیرازی، حاجی غلام حسین اخلاقی، آقا غلام فرید و دیگر شریک ہوئے۔