
عزاداروں کیخلاف ایف آئی آرز کا اندراج شرمناک حرکت ہے، علامہ مقصود ڈومکی
شیعہ نیوز: مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا ہے کہ آج ہر رنگ نسل اور مذہب کے انسان حضرت امام حسین علیہ السلام کو اپنا رہبر و رہنماء قرار دیتے ہیں۔ فلسطینی عوام اسوہ شبیری کی پیروی کر رہے ہیں۔ انہوں نے کہا کہ ریاستی ادارے عزاداروں کے ساتھ تعاون کریں۔ یہ بات انہوں نے پنوعاقل اور جیکب آباد میں عشرہ محرم الحرام کی مجالس عزاء سے خطاب کرتے ہوئے کہی۔ انہوں نے کہا کہ عالم انسانیت کو ظلمت و گمراہی سے نکلنے کے لئے نور ہدایت کی ضرورت ہے۔ نواسہ رسول حضرت امام حسین علیہ السلام سراپا نور اور ہدایت ہیں، جن کی پیروی باعث ہدایت و کشتی نجات ہے۔ انہوں نے کہا کہ کربلا حق و باطل کے درمیان حد فاصل ہے اور ہر دور کی یزیدیت کو رسوا کرنے کے لئے اسوہ شبیری اپنانے کی ضرورت ہے۔ آج امت مسلمہ کو سیرت امام حسین علیہ السلام کا بغور مطالعہ کرنا چاہئے تاکہ وہ عصر حاضر کی یزیدیت کا مقابلہ کر سکیں۔
انہوں نے کہا کہ ہر غیرت مند انسان پر واجب ہے کہ وہ فلسطین کے مظلوم مسلمانوں کی حمایت کرے اور ان کی مدد کرے۔ عصر حاضر کے کربلا میں غزہ کے مظلوم مسلمانوں نے اسوہ شبیری اپناتے ہوئے اسرائیلی مظالم کا جرأت سے مقابلہ کیا ہے۔ کربلا 72 کی مختصر تعداد کو نو لاکھ کی فوج کو عبرتناک شکست دینے کا ہنر سکھاتی ہے۔ آج ہر رنگ نسل اور مذہب کے انسان حضرت امام حسین علیہ السلام کو اپنا رہبر و رہنماء قرار دیتے ہیں۔ انہوں نے کہا کہ صوبہ پنجاب میں عزاداروں کے خلاف غیر آئینی پابندیاں ناقابل قبول ہیں۔ عزاداری امام حسین علیہ السلام ہمارا بنیادی آئینی حق ہے۔ ریاستی ادارے عزاداروں کے ساتھ مکمل تعاون کرکے اپنی آئینی ذمہ داری پوری کریں۔ عبادت کو جرم قرار دے کر عزاداروں کے خلاف ایف آئی آرز کا اندراج شرمناک حرکت ہے۔