عید کے دن اپنے رشتہ داروں، یتیموں، ہمسایوں اور بے سہارا لوگوں کو یاد رکھیں، علامہ افتخار حسین نقوی

شیعہ نیوز: چیئرمین امام خمینی (رہ) ٹرسٹ علامہ سید افتخار حسین نقوی کا عید کے پیغام کا متن حسبِ ذیل ہے:

بسم اللہ الرحمٰن الرحیم۔ اللھم صل علی محمد وآل محمد وعجل فرجھم والعن اعدائھم من الانس والجن من الاولین والآخرین۔

سلام علیکم ورحمۃ اللہ وبرکاتہ

عید کی خوشیاں مبارک ہوں۔ تقبل اللہ صیامکم ودعاءکم وتلاوۃ القرآن وایتاء الصدقات فی شھر رمضان المبارک۔

اس دفعہ عید الفطر مصائب کی داستان لے کر آئی ہے۔ ارض مقدس خون خون ہے۔ غزہ، لبنان، یمن، شام میں مسلمانوں کا قتل عام ہو رہا ہے۔ پورا عالم انسانیت اس ظلم پرخاموش تماشائی ہےاور مسلمان حکمران اپنی اسلامی ذمہ داری ادا نہیں کر رہے ۔اس پر ہرمسلمان کا دل افسردہ ہے اور ہمارا پیارا وطن پاکستان دہشت گردوں کے نشانے پر ہے۔ روزانہ پاک فوج کے جوان وطن کے دفاع اور امن کے قیام کے لئے شہادتیں پیش کر رہے ہیں۔

یہ بھی پڑھیں: شوال کا چاند نظر آ گیا، عید الفطر 31 مارچ 2025 کو ہوگی

آئیے مل کر اللہ سے دعاء کریں کہ “یا رب العالمین بحق محمد وآل محمد علیہم السلام ظالموں کے خاتمے کے ایام جلد لے آ، مظلوموں کی غیب سے مدد فرما، مجاہدوں کوہر محاذپر فتح ونصرت عطا فرما”۔

موجودہ حالات میں ہماری ذمہ داری ہے کہ ظالموں کے ظلم کی ہر سطح پر تشہیر کریں۔ مظلوموں پر ہونے والے مظالم کو ہر جگہ بیان کریں، مسلمانوں کو ان کی ذمہ داریوں سے آگاہ کریں، ظالموں اور دہشت گردوں کی پہچان کروائیں۔ مظلوموں کی مدد بنیں اور ظالموں کے دشمن بنیں، عید کے دن پاکستان میں شہداء دفاع وطن وقیام امن کے لواحقین کے گھروں میں جاکر اظہار ہمدردی کے ساتھ انہیں پیغام دیں کہ آپ پوری قوم کے محسن ہیں۔

اس دن اپنے کمزور اورمحروم رشتہ داروں ۔یتیموں ۔ہمسایوں اور بے سہارا لوگوں کو ضرور یاد رکھیں۔

اللھم العن اعداء دینک وعجل لولیک المھدی الفرج والعافیت والنصر والتائید واجعلنا من انصارہ واعوانہ بفضلک وکرمک یا رب العالمین بحق محمد وآل محمد علیہم السلام۔