ایران کے خلاف ممکنہ عسکری اقدام، روس کا انتباہ
شیعہ نیوز: روسی وزارت خارجہ نے ایران کے جوہری معاملے کے عسکری حل کے خلاف سخت انتباہ جاری کیا ہے۔
رپورٹ کے مطابق، روسی وزارت خارجہ نے امریکی صدر ٹرمپ کی ایران کے خلاف دھمکیوں پر ردعمل میں کہا ہے کہ ماسکو ایران کی جوہری تنصیبات پر کسی بھی بیرونی حملے کی شدید مخالفت کرتا ہے۔
وزارت خارجہ کے مطابق ایران کے مخالفین کو تہران کے ساتھ اپنے اختلافات کو عسکری طاقت کے ذریعے حل کرنے سے باز رہنا چاہیے۔ اس قسم کے عسکری اقدامات پورے خطے اور دنیا کے لیے سنگین اور وسیع تر نتائج کا سبب بن سکتے ہیں۔
یہ بھی پڑھیں : مسجد الاقصی پر صیہونیوں کے حملوں کی مذمت کرتے ہیں، ترجمان دفتر خارجہ پاکستان
روسی حکومت نے مغربی ممالک پر الزام لگاتے ہوئے کہا کہ وہ بین الاقوامی قراردادوں کی خلاف ورزی کررہے ہیں اور عالمی جوہری توانائی ایجنسی کو اپنے سیاسی مقاصد کے لیے استعمال کررہے ہیں۔
ماسکو نے اس بات پر زور دیا کہ جوہری ہتھیاروں کے عدم پھیلاؤ کے معاہدے کے مطابق، ایران کو پرامن جوہری توانائی کے استعمال کا مکمل حق ہے۔
واضح رہے کہ روسی نائب وزیر خارجہ سرگئی ریابکوف اور ایرانی نائب وزیر خارجہ برائے سیاسی امور مجید تخت روانچی نے ملاقات کی تھی اور باہمی تعلقات سمیت جوہری پروگرام کے بارے میں تبادلہ خیال کیا تھا۔
