صدر ٹرمپ کا فلسطین میں صیہونی آباد کاری کی حمایت کا اعلان

شیعہ نیوز (پاکستانی شیعہ خبر رساں ادارہ) امریکی وزیر خارجہ مائیک پومپیو نے صدر ٹرمپ کی موجودہ پالیسی کا اعلان کرتے ہوئے کہا ہے کہ امریکہ مغربی کنارے میں صیہونی بستیوں کی آبادکاری کی حمایت کرتا ہے اور اسرائیل کے اس اقدام کو عالمی قوانین کی خلاف ورزی نہیں سمجھتا۔

بین الاقوامی خبر رساں ادارے کے مطابق امریکی وزیر خارجہ مائیک پومپیو نے اپنے ایک بیان میں فلسطین سے متعلق صدر ٹرمپ کی پالیسیوں کو وضاحت سے پیش کرتے ہوئے اسرائیلی اقدامات کی بھرپور حمایت کی ہے۔

صدر ٹرمپ نے اسرائیل کے ناجائز تسلط کے خلاف اپنے پیشروؤں کی پالیسیوں کو یکسر مسترد کردیا۔

وزیر خارجہ مائیک پومپیو نے اسرائیلی تسلط پر اپنے پالیسی بیان میں کہا کہ امریکہ فلسطین میں اردن کی سرحد کے نزدیک مغربی کنارے میں بنائی گئیں صیہونی بستیوں کو عالمی قوانین کی خلاف ورزی تصور نہیں کرتا اور اس تنازع کا فیصلے کرنے کا اختیار صرف اسرائیل اور فلسطین کو ہے۔

ادھر اسرائیلی وزیراعظم نیتن یاہو نے آبادکاریوں سے متعلق امریکی موقف کا خیر مقدم کرتے ہوئے کہا ہے کہ امریکہ نے حقائق کو مدنظر رکھتے ہوئے اپنی ایک غلطی کو درست کیا ہے جو ایک خوش آئند تبدیلی ہے اور اس سے خطے میں امن کی نئی راہ کھلے گی اور تناؤ کا خاتمہ ہوگا۔

دوسری جانب فلسطینی اتھارٹی نے امریکہ کی نئی پالیسی کو دھونس اور دھمکی قرار دیتے ہوئے کہا ہے کہ امریکہ نے اپنی ضد کے آگے عالمی قوانین کو بھی تہہ و بالا کردیا ہے۔ امن پسند امریکی عوام بھی اس پالیسی کو قبول نہیں کریں گے۔ مغربی کنارے کا علاقہ ایک دن مکمل طور پر فلسطین کا حصہ ہوگا۔

واضح رہے کہ اسرائیل نے 1967 کی جنگ کے دوران مغربی کنارے، مشرقی یروشلم، غزہ اور شام کی گولان کی پہاڑیوں پر قبضہ کر لیا تھا صرف مغربی کنارے اور مشرقی یروشلم میں 140 صیہونی بستیاں آباد ہیں جن میں لاکھوں یہودی آباد ہیں۔