ضلع کرم سےہر روز آنیوالی خبریں انتہائی تکلیف دہ و کربناک ہیں، بحالی ِ امن کیلئےفوری اقدامات ضروری ہیں، علامہ ساجد نقوی
شیعہ نیوز : سربراہ شیعہ علماء کونسل پاکستان علامہ سید ساجد علی نقوی نے ضلع کرم میں بڑھتی کشیدگی کو انتہائی تشویشناک قرار دیتے ہوئے ایک مرتبہ پھر فوری اقدامات کی جانب وفاقی و صوبائی حکومتوں کو متوجہ کرتے ہوئے کہا ہے کہ ہر روز آنیوالی خبریں انتہائی تکلیف دہ کیساتھ کربناک صورتحال کی تصویر پیش کر رہی ہیں، امن کی بحالی کیلئے مزید تاخیر کے منفی اثرات مرتب ہونگے۔ ان خیالات کا اظہار انہوں نے ضلع کرم کی صورتحال پر مختلف شخصیات سے گفتگو کرتے ہوئے کیا۔ انہوں نے کہاکہ ضلع کرم کے علاقوں پیواڑ، تری منگل، کنج علیزئی، خارکلی و دیگر علاقوں میں کشیدگی بڑھنے اور انسانی جانوں کے ضیاع کی جو خبریں آ رہی ہیں، وہ انتہائی تکلیف دہ اور علاقے کی کربناک صورتحال پیش کر رہی ہیں۔
یہ بھی پڑھیں: سید حسن نصر اللہ سلامتی کے ساتھ محفوظ مقام پر موجود ہیں،المنار ٹی وی
علامہ ساجد علی نقوی نے کہا کہ اس کشیدگی کے سبب صوبائی دارالحکومت سے علاقے کا رابطہ منقطع ہونے کی اطلاعات بھی ہیں، ایسی صورتحال میں وفاقی و صوبائی حکومتوں کو بغیر کسی تاخیر کے فوری طور پر نوٹس لینا چاہیے اور امن کی بحالی کیلئے فوری طور پر سنجیدہ اقدامات اٹھانا چاہئیں، راستوں کی بحالی سمیت دیگر اقدامات اٹھائے جائیں تاکہ خطے سمیت پورا صوبہ محفوظ رہے اور منفی اثرات سے بچا جا سکے، لہٰذا ہم بارہا ارباب اختیار کو متوجہ کر رہے ہیں وہ سنجیدگی سے اس معاملے پر توجہ کریں اور مزید کسی بڑے بحران سے بچانے کیلئے پیشگی اقدامات اٹھائیں۔
