سعودی عرب کے لڑاکا طیاروں کی صعدہ کے مختلف علاقوں پر بمباری
شیعہ نیوز (پاکستانی شیعہ خبر رساں ادارہ) جارح سعودی عرب کے لڑاکا طیاروں نے شمالی یمن کے صوبہ صعدہ کے مختلف علاقوں پر بمباری کی ہے۔
المسیرہ ٹی وی نے اعلان کیا ہے کہ صوبہ صعدہ کے منبہ علاقے پر سب سے زیادہ بمباری کی گئی ہے۔ابھی تک ان حملوں میں ہونے والے ممکنہ جانی و مالی نقصان کی تفصیلات سامنے نہیں آئی ہیں۔
سعودی عرب کے جنگی طیارے مسلسل صوبہ صعدہ پر بمباری کر رہے ہیں۔جارح سعودی عرب مارچ دوہزار پندرہ سے امریکہ ، متحدہ عرب امارات اور کچھ دیگر ملکوں کی مدد سے یمن پر مسلسل حملے کر رہے ہیں اور اس کا زمینی ، فضائی اور بحری محاصرہ کئے ہوئے ہیں۔
بین الاقوامی میڈیا کی رپورٹ کے مطابق یمن پر مسلط کردہ جنگ میں جارح سعودی عرب کی طرف سے اکتوبر 2019ء کے صرف ایک ماہ کے دوران بیگناہ یمنی عوام پر 7 ہزار 600 حملے کئے گئے ہیں جن میں ہوائی حملوں کے علاوہ میزائل اور توپخانے کے حملے بھی شامل ہیں۔
دوسری جانب عرب نیوز چینل مرآۃ الجزیرہ کے مطابق یمنی ایوی ایشن اتھارٹی کے سربراہ مازن الصوفی نے کہا ہے کہ اقوام متحدہ نے جارح ملک سعودی عرب پر صنعاء ایئرپورٹ کا محاصرہ ختم کرنے کیلئے ڈالا جانے والا دباؤ بھی اٹھا لیا ہے۔
یمنی ایوی ایشن اتھارٹی کے سربراہ مازن الصوفی کا کہنا تھا کہ بجائے اقوام متحدہ کے، اب بیرون ملک مقیم یمنی شہری صنعاء کی ایئرپورٹ کھلوانے کیلئے سعودی عرب پر دباؤ ڈال رہے ہیں جبکہ یہ اقوام متحدہ کی سلامتی کونسل کیلئے ایک انتہائی شرم کی بات ہے۔
انہوں نے اپنے بیان میں کہا کہ مسلم و غیر مسلم بین الاقوامی انسانی حقوق کی 12 تنظیمیں سعودی عرب کی طرف سے صنعاء ایئرپورٹ کے ہوائی محاصرے کے خلاف آواز بلند کر رہی ہیں جن کے ہم شکرگزار ہیں۔
