آل سعود نااہل، حرمین کی سیکیورٹی مشترکہ کمیٹی کے سپرد کی جائے
انصاراللہ کے ہاتھوں آرامکو اور نجران میں بدترین شکست آل سعود کی دفاعی صلاحیت کی ناکامی ہے
شیعہ نیوز (پاکستانی شیعہ خبر رساں ادارہ) وفاق المدار س الشیعہ پاکستان کے نائب صدر علامہ قاضی نیاز حسین نقوی نے مطالبہ کیا ہے کہ نہتے حوثی قبائل کے مقابلے کی سکت نہ رکھنے والے آل سعود، حرمین شریفین کی حفاظت کی صلاحیت نہیں رکھتے، اس لئے ایمانی مراکز کے انتظامات عالم اسلام کے ممالک پر مشتمل کمیٹی کے سپرد کئے جائیں۔
لاہور میں میڈیا سے گفتگو میں انہوں نے کہا کہ تباہ شدہ یمن کے حوثی قبائل کے اتحاد انصاراللہ کے ہاتھوں آرامکو کمپنی اور نجران میں بدترین شکست سے آل سعود کی دفاعی صلاحیت کی ناکامی پوری دنیا نے دیکھ لی ہے، جس سے عالَم اسلام کے دینی، ایمانی و روحانی مراکز حرمین شریفین کی حفاظت کیلئے سعودی حکومت نے خود کو نااہل ثابت کر دیاہے۔
یہ خبر بھی پڑھیں سعودی فوجی اتحاد کی بدترین شکست، راحیل شریف کے حوالے سے اہم فیصلہ
انہوں نے کہا کہ گریٹر اسرائیل کے نقشہ میں مکہ اور مدینہ بھی شامل ہیں۔ خدانخواستہ اسرائیل نے جسارت کی تو سعودی حکومت کی دفاعی صلاحیت سب کے سامنے ہے جوکہ کسی بھی قسم کے دفاع کیلئے قطعی ناکام و نااہل ہیں، جو ملک 42 ملکی فوجی اتحاد، بے پناہ اسلحہ، امریکی سرپرستی کے باوجود تباہ شدہ یمن کے کمزور گروہ حوثیوں کے ہاتھوں اپنے قیمتی اثاثوں کا دفاع نہیں کر سکاوہ اسرائیل جیسے بدترین مضبوط دشمن کا کیونکر مقابلہ کرے گا؟ لہٰذا عالَم اسلام کی عزت و عظمت کی بقاء اور حرمین شریفین کے دفاع کیلئے لازم ہے کہ مقامات ِ مقدسہ کی حفاظت اور نظم و نسق کیلئے مسلم ممالک پر مشتمل وسیع کمیٹی بنائی جائے تاکہ اسرائیل ایسی جرات ہی نہ کر سکے۔
