اسرائیلی جارحیت کے مقابلے میں ایرانی عوام کی بہادری کو خراج تحسین، شہباز شریف

شیعہ نیوز: پاکستان کے وزیراعظم شہبازشریف نے کابینہ کے اجلاس میں علاقے کے حالات کا ذکر اور خاص طور پر ایران پر مسلط کی گئی اسرائیلی جنگ کے رک جانےپر خوشی کا اظہار کرتے ہوئے کہا کہ یہ خداوندعالم کا لطف و کرم ہے کہ یہ جنگ رک گئی۔ شہبازشریف نے کہا کہ صیہونی حکومت کے حملوں کا ایران کے عوام نے پوری شجاعت اور بہادری کے ساتھ ڈٹ کر مقابلہ کیا اور دباؤ کے سامنے نہيں جھکے۔

یہ بھی پڑھیں: امریکہ، اسرائیل اور بھارت انسانیت کے قتل میں ملوث ہیں، ملی یکجہتی کونسل

پاکستانی وزیراعظم کا کہنا تھا کہ پاکستانی فوج کے سربراہ نے امریکی صدر ٹرمپ سے ملاقات کے بعد استنبول میں ایران کے وزیرخارجہ سے ڈیڑھ گھنٹے ملاقات کی اور اس سلسلے میں پاکستان کے اقدامات کی وضاحت کی جاچکی ہے۔ ان کا کہنا تھا کہ ایرانی صدر سے ٹیلی فونی گفتگو میں بھی فریقین کا اس بات پر مکمل اتفاق تھا کہ جنگ اسرائیل نے شروع کی ہے اور ایران نے صرف اپنا دفاع کیا ہے جو مکمل طور پر قانونی اور جائز تھا۔ پاکستانی وزیراعظم نے کہا کہ ہم اللہ کا شکر اداکرتے ہيں کہ یہ جنگ رک گئی ہے ورنہ اس کے پوری دنیا کے لئے انتہائی خطرناک نتائج نکل سکتے تھے۔