شہید علی ناصرصفوی اور ان کی اہلیہ کی شہادت کو 20 برس بیت گئے
شیعہ نیوز : عاشق امام زمانہ ؑ شہید علی ناصرصفوی اور ان کی اہلیہ محترمہ کی شہادت کوآج 20 برس بیت گئے۔ ایک ایسا خاندان جس پر آج کےصبح قیامت ٹوٹ پڑی تھی۔ شہید کی یاد آج بھی ملت جعفریہ کے دلوں میں روشن چراغ کی مانند زندہ ہے۔ شہید کے ورثاء ریاست پاکستان سے آج بھی انصاف کے منتظر ہیں ۔
رپورٹ کے مطابق آج شہید علی ناصرصفوی اور ان کی اہلیہ محترمہ کی 20 ویں برسی منائی جارہی ہے ۔شہید علی ناصرصفوی انتہائی باتقویٰ، بااخلاق، دینداراور عاشق امام زمانہ ؑ تھے ۔ انہیں آج ہی کے دن یعنی 25 نومبر 2000 کو جوہرآباد میں ان کے گھر میں گھس کر شہید کردیا گیا تھا اور افسوس اس سانحے میں ان کے ہمراہ ان کی اہلیہ محترمہ اور ان کےشکم میں موجود ایک معصوم بھی مقام شہادت پر فائز ہوا تھا۔
واضح رہے کہ شہید علی ناصرصفویٰ کو مارنے کیلئے ضلع بھر کی ناکہ بندی کی گئی تھی، اسلام آباد سے خصوصی فورس ایک ایس ایس پی کی قیادت میں آئی تھی اور ان کی سربراہی بقول ہفت روزہ تکبیر امریکی اسپیشل فورسز کے کمانڈوز کر رہے تھے۔شہید پر الزام عائد کیاگیا تھا کہ اس نے اقوام متحدہ کے دفتر پر راکٹ لانچر چلائے تھے۔
اسکے گھر کا محاصرہ کرکے اس پر یلغار کر دی گئی اور اس کے گھر میں داخل ہو کر اس پر گولیوں کی برسات کر دی گئی، نہ صرف اس ایک شخص پر بلکہ اس کی بیوی اور اس کے پیٹ میں موجود اس کے بچے پر بھی ترس نا کھایا گیا۔ کیا عجیب رات تھی، جب ایک ماں کے سامنے اس کا اکلوتا بیٹا گولیوں سے چھلنی کیا جائے، جب ایک ماں کے سامنے اس کی بہو کو گولیوں سے بھون دیا جائے ،جب دو کم سن بچیوں کے سامنے ان کے باپ اور ماں کو خون میں لت پت کر دیا جائے۔
