شام: 40 سے زائد دیہات اور کالونیاں دہشت گردوں کے قبضے سے آزاد

شیعہ نیوز (پاکستانی شیعہ خبر رساں ادارہ) شام کی مسلح افواج کے کمانڈر نے کہا ہے کہ صوبہ ادلب کے چالیس سے زیادہ دیہات اور کالونیاں فوجی آپریشن میں دہشت گردوں کے قبضے سے آزاد کرا لی گئی ہیں۔

شام کی سرکاری خبررساں ایجنسی سانا کی رپورٹ کے مطابق اس بیان میں آیا ہے کہ شام کی فوج ، جنوبی اور جنوب مشرقی ادلب میں اپنی کارروائیاں جاری رکھے ہوئے ہے اور گذشتہ چند روز کے دوران ادلب کے تین سو بیس کلومیٹر سے زیادہ علاقے کو جبھۃ النصرہ اور دیگر دہشت گرد گروہوں کے قبضے سے آزاد کرا چکی ہے۔

شام کی فوج نےگذشتہ اگست میں اسٹریٹیجک شہر خان شیخون اور صوبہ حماہ کے شمال مغربی علاقوں سمیت صوبہ ادلب کے ایک بڑے رقبے کو دہشت گردوں کے قبضے سے آزاد کرا لیا تھا۔

صوبہ ادلب شام میں دہشت گردوں کا آخری اڈہ ہے۔ شام نے بارہا ادلب کی آزادی پر تاکید کی ہے اور دہشت گردوں نیز اس علاقے میں تعینات غیرملکی فوجیوں کو ادلب سے باہر نکلنے کا انتباہ دیا ہے۔