سانحہ نارووال، ایس ایچ او ریاض تاثیر معطل، اسیر خواتین رہا

شیعہ نیوز: مقامی ذرائع کا کہنا ہے کہ سانحہ نارووال کے ذمہ دار ایس ایچ او ریاض تاثیر چیمہ کو معطل کر دیا گیا جبکہ گرفتار ہونے والے تمام خواتین کو بھی رہا کر دیا گیا ہے۔

رپورٹ کے مطابق ڈی پی او نارووال ذوالفقار احمد نے شکایات موصول ہونے پر ڈی ایس پی نارووال کو واقعہ کی انکوائری کا حکم دیا تھا۔

ڈی ایس پی نے ایس ایچ او کی موجودگی میں واقعہ کی انکوائری کی جس میں ایس ایچ او نارووال سٹی ریاض تاثیر چیمہ کے خلاف اختیارات کا ناجائز استعمال، خواتین کے ساتھ بدتمیزی سمیت دیگر الزامات ثابت ہو گئے جس پر ڈی ایس پی نے ڈی پی او کو رپورٹ بھیج دی جس پر ڈی پی او ذوالفقار احمد نے ایس ایچ او کو معطل کر دیا ہے جبکہ گرفتار ہونیوالی خواتین کو بھی رہا کر دیا گیا ہے۔

یاد رہے کہ اربعین کے موقع پر خواتین کے خلاف اربعین واک کرنے پر مقدمہ درج کیا گیا تھا اور پولیس نے ایس ایچ او ریاض تاثیر چیمہ کی قیادت میں چادر اور چار دیواری کا تقدس پامال کرتے ہوئے متعدد خواتین کو گرفتار کر لیا تھا جبکہ 25 سے زائد خواتین اور بچے زخمی بھی ہو گئے تھے۔