صیہونی جنگی طیاروں کی غزہ پر بمباری، کئی عمارتیں تباہ
شیعہ نیوز: اسرائیلی فضائیہ کے جنگی طیاروں نے غزہ کی پٹی پر بمباری کی، جس کے نتیجے میں درجنوں عمارتیں اور کئی ایکڑ پر محیط فصلیں تباہ ہوگئیں۔
عالمی خبر رساں ادارے کے مطابق اسرائیلی فوج نے غزہ کی پٹی کے علاقے خان یونس پر حماس کے ٹھکانوں پر بمباری کرنے کا دعویٰ کیا ہے تاہم حملے میں کسی جانی نقصان کی اطلاع موصول نہیں ہوئی ہے۔
مقامی ذرائع کے مطابق وسطی غزہ میں دیر بالا شہر کے مشرق میں ایک جنگی طیارے نے کاشت شدہ اراضی پر تین میزائل داغے۔ خوش قسمتی سے ، فضائی حملوں میں کوئی شخص زخمی نہیں ہوا ، جس کی وجہ سے اس علاقے میں صرف مادی نقصان ہوا۔
اسرائیلی فوج کے ترجمان کا کہنا ہے کہ فضائی بمباری غزہ کی جانب سے اسرائیلی زمین پر ایک راکٹ داغے جانے کے جواب میں کی گئی۔ راکٹ کو اسرائیل کے دفاعی نظام نے فضا میں ہی ناکارہ بنادیا تھا۔
ادھر حماس کے ترجمان نے کہا کہ اسرائیلی طیاروں نے خان یونس میں کھیتوں کو نشانہ بنایا، جس سے کئی ایکڑ پر محیط فصلیں اور درجنوں گھر تباہ ہوگئے۔ حماس نے اسرائیل کے راکٹ حملے کے الزام کو جھوٹا قرار دیدیا۔
