صیہونیت مخالف جذبہ فلسطین کی آزادی کا پیش خیمہ ہے۔ حماس
شیعہ نیوز (پاکستانی شیعہ خبر رساں ادارہ) فلسطینی تحریک حماس نے مغربی کنارے کے فلسطینی نوجوانوں میں پیدا ہونے والے صیہونیت مخالف جذبے کو سرزمین فلسطین کی آزادی کا پیش خیمہ قرار دیا ہے۔
حماس کے جاری کردہ بیان میں کہا گیا ہے کہ مغربی کنارے کے شہروں میں آباد فلسطینیوں کی عظیم استقامتی تحریک اسرائیل کے غاصبانہ قبضے کے خلاف ہمہ گیر اور دائمی انقلاب کی علامت ہے۔
حماس کے بیان میں یہ بات زور دے کر کہی گئی ہے کہ فلسطینیوں کی ہمہ گیر استقامت نے سینچری ڈیل کو عملی جامہ پہنانے کی امریکہ اور صیہونی خواہش کو خاک میں ملا دیا ہے۔
فلسطینی عوام نے جمعرات کو امریکی صیہونی منصوبے سینچری ڈیل کے خلاف احتجاج کرتے ہوئے دو الگ الگ کارروائیوں کے درمیان متعدد اسرائیلی فوجیوں پر حملے کیے ہیں۔
پہلی کارروائی مقبوضہ بیت المقدس میں انجام دی گئی جس میں ایک فلسطینی شہری نے چودہ صیہونی فوجیوں کو اپنی گاڑی تلے روند کر زخمی کردیا۔
دوسری کارروائی میں ایک فلسطینی نوجوان نے مسجدالاقصی باب الاسباط کے قریب کھڑے صیہونی فوجیوں پر فائرنگ کردی جس میں ایک صیہونی فوجی زخمی ہوگیا۔
بعد ازاں اسرائیلی فوجیوں نے فائرنگ کرکے مذکورہ فلسطینی نوجوان کو شہید کردیا۔مغربی رام اللہ کے کرکر ٹاؤن میں ایک فلسطینی نوجوان نے فائرنگ کرکے ایک صیہونی فوجی کو زخمی کردیا ہے۔
جمعرات کے روز مغربی کنارے اور مقبوضہ بیت المقدس میں اسرائیلی فوجیوں کی فائرنگ میں کم سے کم چار فلسطینی شہید اور اسی کے قریب زخمی ہوئے ہیں۔
