شیعہ اثناء عشری اسلامک سینٹر گلاسگو میں جشن انوار شعبان کا انعقاد
شیعہ نیوز: برطانوی شہر گلاسگو میں شیعہ اثناء عشری اسلامک سینٹر کے زیر اہتمام عظیم الشان جشنِ انوارِ شعبان کا انعقاد کیا گیا۔ جشن کی صدارت معروف منقبت خواں شفاعت نقوی نے کی، جبکہ نظامت کے فرائض ذاکر اہلبیت سید رضوان کاظمی نے انجام دیئے۔ جشن میں خصوصی شرکت و خطاب پاکستان سے تشریف لائے ہوئے مہمان عالم دین حجۃ السلام و المسلمین مولانا سید عارف حسین کاظمی نے کیا، اس موقع پر اسکاٹ لینڈ کے معروف ذاکر و منقبت خواں شفاعت حسین نقوی، رضوان کاظمی و اعجاز حسین کربلائی سمیت مقامی ذاکرین و منقبت خواں حضرات نے بارگاہ اہلبیتؑ میں نذرانہ عقیدت پیش کئے۔ جشن میں مولانا نور الحسن، اسکاٹ لینڈ کی معروف سماجی شخصیات ملک شاہد، ملک عدنان، اسد کاظمی، مبشر نقوی، علی عباس، ڈاکٹر موسیٰ، سلطان نقوی، عاطف نقوی، علی زوہیب سمیت کثیر تعداد میں عاشقان اہلبیتؑ نے شرکت کی۔
ولادت باسعادت حضرت امام حسینؑ و مولا عباس علیہ السلام کی مناسب سے منعقدہ جشن سے مرکزی خطاب کرتے ہوئے مولانا سید عارف حسین کاظمی نے کہا کہ کربلا جذبات کا نام نہیں، کربلا عاقلانہ محبت اور اخلاق و وفا کا نام ہے۔ اس موقع پر مولانا عارف حسین کاظمی نے مغربی معاشرے میں اسلامی اقدار پر زیادہ سے زیادہ عمل کرنے پر زور دیا اور کہا کہ برطانیہ اور دیگر مغربی ممالک میں مقیم افراد کو امام حسینؑ اخلاق اور مولا عباسؑ علمدار سے وفا درس لینا چاہیے۔
