عالمی دباو کے باعث پاکستان میں فلسطین کے لیے آواز اٹھانا جرم بن گیا ہے، سراج الحق

شیعہ نیوز: جماعت اسلامی پاکستان کے سابق امیر سراج الحق  نے کہا ہے کہ غزہ معاملے پر پاکستانی حکمرانوں کا کردار منافقانہ ہے، شہباز شریف اور زرداری ٹرمپ کی کال کے انتظار میں ہیں، عالمی دباو کے نتیجہ میں آج پاکستان میں فلسطین کے لیے آواز اٹھانا جرم بن گیا ہے۔ ان خیالات کا اظہار انہوں نے گورنمنٹ ڈگری کالج گل آباد دیر لوئر میں سالانہ سٹوڈنٹس ایجوکیشن ایکسپو سے خطاب کرتے ہوئے کیا۔ سراج الحق نے کہا ہے کہ ہم اللہ کا شکر ادا کرتے ہیں کہ ہم حق کے ساتھ کھڑے ہیں، مسئلہ فلسطین پونے 2 ارب مسلمانوں اور 58 اسلامی ممالک کے لیے امتحان ہے، ہم دیکھتے ہیں وہ ہمارے معصوم بچوں کو جلا رہے اور ان کے ہاتھ پاوں کو کاٹ رہے ہیں۔

یہ بھی پڑھیں: حزب اللہ کے میزائل حملے، تل ابیب دھماکوں سے لرز اٹھا، نہاریہ میں 4 صیہونی ہلاک و زخمی

سراج الحق  نے مزید کہا کہ اسلامی جمعیت طلبہ امت کا سرمایہ ہے، اسلامی جمعیت طلبہ، طلبہ کی واحد منظم تنظیم ہے جو پاکستان کے تعلیمی اداروں میں اسلامی اقدار کی ترویج کے لیے کوشاں ہے۔ اسلامی پاکستان اور خوشحال پاکستان کا قیام آج کے طالب علم کے لیے بڑا چیلنج ہے، آج کل کی سیاست میں سیاستدانوں نے ایک دوسرے پر بے بنیاد الزامات، بدتہذیبی اور گالم گلوچ کے کلچر کو فروغ دیا۔ اسلامی جمعیت طلبہ نے گل آباد کالج میں تمام طلبہ تنظیموں کو اکٹھا کرکے سیاست میں شرافت، باہمی اتحاد و بھائی چارے کے کلچر کو فروغ دیا۔ ایکسپو سے صوبائی ناظم وسیم حیدر، ناظم مقام محمد تیمور، ناظم کالجز فیاض الحق فیضی، ناظم کالج اصغرخان نے بھی خطاب کیا۔